«Единая Россия» партиялул сипталийну Аьрасатнаву зузи бувсса, «России важен каждый ребенок» тIисса, щалва билаятран аьмсса, проектрал лагрулуву ва нюжмардий МахIачкъалалив «Россия» комплексраву, «Добрые руки» тIисса цIанилу, хьунни ОьрчIал къатраву хъуни хъанахъисса оьрчIан кумагрансса хъуннасса рахIму-цIимилул концерт. Мунил сакиншинначи ва каялувчи ур Каспийскаллал ОьрчIал къатлуву хъуна хьусса, хIакьину Дагъусттаннайсса ОьрчIал къатрал координаторшиву дуллалисса Мурад Мусакаев.

Зулайхат Тахакьаева
Ятинсса оьрчIал чIарав бацIан ва ххуллухгу бувкIун бия ва акциялул муданмасса чIарахбацIулт – дагъусттаннал балайчитал, Нурианна Каллаева, Марианна, Кристина, Пьер Айджо щалва кулпатращал, МахIачкъала шагьрулул 8-мур музыкалул школалул директор Зульфия «Молодость Кавказа» ансамбльданущал. Концерт­рай чялишсса гьурттушинна дунни оьрчIал къатраву тарбия хъанахъисса оьрчIал цалагу. Концерт ларкьуна Мурад Мусакаевлул ва Таисия Темировал увкусса «Снег» тIисса балайлину.
Акциялул лагрулуву хьунни оьрчIал дурсса суратирттал аукцион.
Хъиривмур кьини «Молодежь Дагестана» кказитрал редакциялий хьунни Мурад Мусакаевлул пресс-конференция. «Добрые руки» акция жулла республикалий лув-ялув буллай хьуну дур 7 шин. Ванал ялагу бувсунни акциялул давриву хъуннасса гьурттушинна дайшиву «Единая Россия» партиялул Дагъусттанналмур отделениялул. Гьашину бувккун бур миннал даврил цIусса уртакьталгу – «Матери России» суккушиннарал Да­гъусттанналмур отделение. Муний каялувшиву дуллай бур Мурад Мусакаев цалашиврий ивхьусса Таиса Билалова.
ЧIарах къабувккун бур Республикалул ХIукуматрал бакIдургьуми ва цинярда минис­терствартту ва ведомствартту, цивппа заллусса предприятияр­тту. Миннал дуллуссагу, концерт­райн бувкIсса тамашачитурал рахIму-цIимилул къуршилувун дирчуссагу арцу дуллуну дур ОьрчIал къатран кумагран. Му­рад Мусакаевлул барчаллагь увкунни, ятинсса оьрчIал буруккинттах баччибакъулшиву къадурну, бюхъайкун чIарав бавцIуцириннахь, хаснува ДР-лул кIулшиву дулаврил ва цIуллу-сагъшиву дуруччаврил министртурахь. ДР-лул ЦIуллу-сагъшиву дуруччаврил министерствалул акциялун кумагран дуллуну дур 53 азарда къуруш. ДР-лул кIулшиву дулаврил ва элмулул министр Шагьаьппас Шагьов, тIурча, ччя-ччяни ялтту уккайсса усса ур ОьрчIал къатрал, цувагу кIулну усса ур шикку тарбия хъанахъисса сайки гьарца оьрчIан: «Дядя Шахабас пришел», — тIий, ванаясса ххаришиврул хIат-хIисав къадикIайсса дур.
Мурад Мусакаевлул бусласимунийн бувну, «России важен каждый ребенок» проектрал мурад Аьрасатнаву оьрчIру цалашиврий бишаврил институт хьхьичIунмай баву бухьурчагу, Дагъусттаннай оьрчIру цалашиврий бишин ччисса 90 кулпатрава, жунна кIулсса сававрайн бувну, му масъала чулийн буккан бан бювхъуну бур так 3 кулпатраща.
Ванал ялагу бувсунни жулла республикалий ОьрчIал къат­равусса тагьар щалла ялун чIалачIисса куццуйсса дакъашиву. Мунийн бувну, цIанакул ласлай бусса бур ОьрчIал къат­рал вивсса оьрму ккаккан буллалисса киносурат. Мунил презентация хьун тIий дур ялунчIил февраль зурул 20-нний, Мурад Мусакаев ниттил увсса кьини.