Августрал байбихьулий «Илчилул» редакциялийн бувкIунни Г. МахIаммадов тIисса дюхъличунал оьруснайсса чагъар. Ваний Г. МахIаммадов (ва цу уссарив ттун къакIулли – ХI. Аьдилов) тIий ур: «Я постоянный читатель «Илчи». Раз купил газету «Рутульские Новости» и нашел там статью о настоящем лакце – Гадисове Гадис-хаджи. Почему вы не пишете о хорошем человеке? Рутульцы пишут, а лакцы о лакце не пишут, обидно. Я жду перепечатки этой статьи: «Многогранный алмаз лакца». Друг и сельчанин Гадис-хаджи». «Илчи» кказит муданма чи­гу чичлай, ккагу ккалаккиманан кIулссар жул редакциялул зузалтрачIа ХIадис хIурматрайгу ушиву, ганал кказитрайн чичаймур мудангу бишлайгу бушиву. Му мукун буссия 2-3 шинал хьхьичI Рутуллал райондалул связьрал отделение Рутуллая МахIарамккантлив дизан данцIа. Яла, туну, райондалул почталул отделение Ахттав дакъача, МахIарамккантлив дизан дурну махъ, Дюхълив кказитру, журналлу къабучIай хьуну бур, мунияту ХIадисхъал ХIадислулгу хьхьичIра чичайсса макьалартту «Илчилийн» къачичай, хIатта шяравусса цIусса хавардугума. Агарда ина кказит буккайсса бухьурча, му вин кIулну бикIантIиссар. Жу ХIадислул чичайсса назмурдугу цинярда рирщуссар, цIусса чирчуну духьурча, ттигу рищунну. Мукунна рирщуну диркIссар «Илчилий» ХIадислул чирчусса Дю­къуллал тарихрал ва этнографиялул хIакъиравусса макьаларттугу. ХIадислул 2010 шинал чивчуну буккан бувсса «На краю Лакии» тIисса лу жучIан биян къабунни, мунияту жу муния цичIав къачивчухьунссар. Цуманал цукунсса луттирду итабавкьуну бурив кIул буллай занан жул бурж бакъархха. Вара «Рутульские Новости» кказитрайсса макьалалуву Г. МахIаммадовлул чивчуну бур: «Гадис Исрафилович постоянно публикуется в газете «Илчи» тIий, ялагу бур «Почему вы о хорошем человеке не пишете?» тIий. Шилу, шагьрулий, ккавксса чIумал на ХIадислухь цIувххуссия: «Кказитрайн цIу-цIусса хаварду, макьаларду къачичлай урахха, бизарвагу къавхьурав чичлачаврия?» куну. «Бизар хьуну акъарача, утти жучIан я почта, я кказитру къабучIайссар, мунияту къачичара», — увкуна ганал. «Рутульские Новости» Дюхълив бучIайхьунссар, мунияту тиккун чичлайгу бур. Чичларча чичача, амма яла «Илчилий» ХIадислуя чивчуну бакъар ягу танал макьалартту ришлай бакъар тIунгу циванни. Жухь бур «Рутульские Новости» кказитраяту таржума дурну, «Илчилий» рищара ХIадислуятусса макьала, тIий. Таржума дуллангу циванни, ХIадислул лаккунай чирчуну гьан дарча хъиннихха «Илчилийн». Уттинин чичайсса диркIсса, утти къахъанахъиссарив? ХIадис «Илчилулгу» уртакьрихха. Гьаннайсса, жу ялугьлагьиссару ХIадислул Дюхълиятусса хавардах ва макьаларттах. ХIурматращал ХI. Аьдилов