Хъурхърал аьлимтурал ккуран авадан хьунни

dyt_8Махъсса ппурттуву цалла кIулшивурттайну, цалва гьунарданийну хьхьичIунсса ВУЗ-ирдавунгу бувххун, дуклан ччисса, гъира бусса жагьилсса оьрчIру ва душру нажагьсса бакъа бакъар. ХIакьинусса кьини, хаснува медициналул аралуву ххишала бакъа аьркинну бур мукун гьунар бусса, куртIсса кIулшивуртту ласун, ххаллилсса пишакартал хьун ччисса оьрчIру. Так мукунминнаяр цил багьайкунсса хIакинталгу хьунтIисса, жулла цIуллу-сагъшивугу миннайн вихшала дан бюхъантIисса. Мукунсса жагьилсса пишакартурах мюхтажну бур щалва Аьрасатнал билаят, ва ми лув багьан къабивтун хьхьичIунсса медициналул клиникарттайн жучIава бакъассагу, дазул кьатIувгу кьамул буллай бур.

Имара Саидова
Вай гьантрай жул редакциялийн бавунни ца уттигу ххари хьунсса хавар. Хъурхърал шяравасса аьлимтурал ккуранналувун ххи хьунни жагьилсса аьлимчу Аьлиханов Тимур Маратлул арс.
«Медициналул элмурдал кандидат» тIисса ларайсса цIа дуллунни Аьлиханов Тимур Маратлул арснан. Ванал Москавлий Медиктурал ва биологтурал федерал агенствалул квалификация ларай дайсса институтраву дурурччунни «Состояние и пути повышения эффективности стоматологической помощи лицам пожилого и старческого возраста, а также долгожителей (материалы по республике Дагестан)» тIисса медициналул элмурдал кандидат хъанахъисса диссертация. Тимур Аьлихановлул диссертациялул элмийсса каялувчитал бур медициналул элмурдал доктор, профессор Кьурбанов Оьми Рамазанович ва медициналул элмурдал кандидат Кипарисов Вячеслав Борисович.
Ва диссертация дурурччуну махъ Тимур Маратовичлухь стоматологнал пишакаршиву дакъагу, ихтияр дуссар сайки циняв цIуллу-сагъшиву дуруччаврил идарарттай хIакинтурал пишакаршиву гьаз дуллай, миннал давурттал ялув ацIлан.
Тимур Аьлихановлул 2008-шинал къуртал бувну бур Дагъус­ттаннал Медициналул Академия. Медициналул академиягу къуртал бувну, зий ивкIун ур Сыктывкар шагьрулийсса паччахIлугърал поликлиникалий. АрхIала ва зий уссия Сыктывкар шагьрулий цала буттал Маратлул тIивтIусса ккар­ччал хIакинтурал клиникалийгу. Интернатура къуртал бувну махъ ваная хьуну ур ккарччал хIакин (терапевт-ортопед). Медициналул академиягу хьхьичIунну къуртал бувну, лавайсса даражалул ккарччал хIакингу хьуну, му пишалий гьашивугу къадурну, Тимур Маратович 2011-шинал увххун ур Дагъусттаннал ПаччахIлугърал Медициналул Академиялул аспирантуралувун. 2013-ку шинал ванал дурурччуну дур лавайсса даражалий медициналул хIакиннал диссертация. Вай гьантрай тIурча ванан дуллунни «Медициналул элмурдал кандидат» тIисса бусравсса цIа.
Диссертация дуручлачийни, цIа дурксса профессортурая сакин хьусса комиссиялул чулуха буллалисса циняв суаллан куртIсса жавабру дуллай Тимур Аьлихановлул ляличIинува рязий унни цала элмийсса каялувчи Оьми Рамазанович. Ванал диссертация сакин хьуну дур 22 печатный страницалия, миннува 4 статья рецензия дулайсса журналлайгу итабавкьуну бур. Тимур Маратовичлул ахттар дурсса диссертациягу дур хIакьинусса жула республикалул халкьуннал оьрмулуву хъинну чара бакъа аьркинсса. Ванал цала элмийсса каялувчинащал архIал жула республикалий цалчин ишла буллай байбивхьуну бур лаххайсса ва ликкайсса ккарччал протезру. Ми протезру цивппагу бур цIакьсса, хъунмасса хIаллай бияйсса, кьацIливугу тIааьнну бакьайсса. Мунийну жула респуб­ликалийсса халкьуннан цайми шагьрурдайн, регионнайн къазанай шиккува щаллу хьунсса хъуннасса хIалу дур.
«Использование термопластов медицинской чистоты в стоматологической практике» тIисса вай масъаларттая гьарта- гьарзану чивчусса лу сакин бувну бур Тимур Аьлихановлул цала элмийсса каялувчи Оьми Рамазановичлущал. Тимур Аьлиханов хъунмасса барчаллагь тIий ур ва агьамсса даву ахттар дуллай, цала ялув авцIуну зий ивкIсса элмийсса каялувчи Кьурбанов Оьми Рамазановичлуйн.
Жула чулухагу Тимур Аьлиханов «Медициналул элмурдал кандидат» тIисса бусравсса цIанищал барча уллай, чIа учинну ванан гихуннайгу хIакиннал пишакаршиву профессоргу хьуну хъиннура ларай даву ва цалва хъин буллалисса къашайшалт рязину личIаву.