Барча буллай буру

gor_7Уттигъанну бувсса ташулул тирххандаращал барчагу буллай, барачат буллай буру Кьадиров ХIажинал ва Салиматлул душ Милана ва ванил язи увгьусса Аьмаев Бадавинал ва Наидал арс Меси.

ЧIа тIий буру:

ОьрчIал душ язи бугьай,
Душнил оьрчI язи увчIай,
КIиннал савлугъ хъун дуллай
Хъамал хъатIуйн цачIун шай.

Кьуртти аьнтминнул буцIай,
Арул неъмат хьхьичI бишай,
Куннал кув лахъ баннав тIий
Дуаьлул махъру лахъай.

Оьрму тяхъасса хьуннав,
ОьрчIру, душру бизаннав,
Минная щалихханнин
Заннал зува ябаннав.

Лагмами цIуллу баннав,
ДакIнийн дард къадагьаннав,
Цаннал хIурмат ца буллай
Давраннай яхъананнав.

Зува бувсса нину-ппу
Зунма ччикун битаннав,
Миннал дакIру ххари дан
Кулпатрай аргъ дизаннав.

Цинявппагу зу ххирами

—————————————-

gors_8Сентябрь зурул 8-нний Ккурккуллал шяравасса Тажуттиннул арс Нариман ниттил увну 79 шин бартларгунни.
Нариман ур лайкьну, марцI­ну оьрму бувтсса адамина.

1955 шинал, Ккурккуллал дянивмур даражалул школагу къуртал бувну, увххун ур Винницкий областьрайсса ца шинайсса авиаспециалистал хIадур байсса школалийн. Мугу къуртал бувну, 2 шинай зий ивкIун ур механик-электрикну архсса авиациялул разведполкраву, Брест шагьрулия арх акъа. 1958 шинал, ххуйсса кьиматирттай экзаменнугу дуллуну, увххун ур Ленинградрайсса чил билаятирттал мазурдил институтравун. Институт къуртал бувну мукьах Авгъанисттаннавун зун тIайла увккун, тийх 5 шин ххишалагу дурну дур. Авгъаннава увкIун махъ 6 шинай зий ивкIун ур Тарихрал, мазрал ва литературалул институтрал востоковедениялул отделдануву элмийсса зузалану. Тичча Нариман увцуну ур «Дагобл­совпрофрайн» чил билаятир­ттал туризмалул инструкторну. АцIра шин ххишалагу хьуну дур Совет профсоюзрай инструкторну зий. Тания мукьахгу ва личIи-личIисса идарарттай зий ивкIун ур. Махъсса 23 шинал лажиндарай МахIачкъалаллал 11-мур гимназиялий аьраб мазрал дарсру дихьлай ивкIун ур.
Хъинсса дакIнил ва аьчух­сса хасиятрал заллу Нариман Шейховлухь барча тIий буру ниттил увсса кьини! ЧIа тIий буру цIуллушиву, ужагъраву нахIушиву, оьрмулуву тIайлабацIу. ОьрчIая неъмат ккакканнав, вина ччикун итаннав.
Ина ххирасса дустал,
гъан-маччами

—————————————————

Дунияллийх цIа ларгсса аьлимчу

Уттигъанну, сентябрь зурул 2-нний, 86 шин хьунни дунияллийх цIа ларгсса аьлимчу, тарихрал доктор, ГьунчIукьатIатусса Дандамаев Аьбдулкьадирдул арс МухIаммад ниттил увну. Да­гъусттаннал зунттавусса чIирисса лакрал шяраву увсса учительнал арснаща бювхъунни, Ленинградрай институтгу бувккуну, яла аспирантурагу къуртал бувну, тарихрал аьлимчу хьун. Мунал цIа дунияллийх машгьур хьунни кIиазаллихъайсса шиннардил хьхьичI Парснал паччахI Дарил Бегистуннал даралувусса ххяллуй дурсса чичру таржума дурну. МухIаммадлул таржума даннин му чичру дунияллий щищачIав таржума дуван къархьуну дур.
МухIаммадлун кIулну бур кьунияхъайсса мазру. НемецначIа немец мазрай, ингилисначIа ингилис мазрай, испанначIа испан мазрай, иранначIа иран мазрай мунал марцIну лекциярду буккай. Элмулуву хъуннасса агьамшиву дусса, нукIузаманнул хIукуматирттал багьу-бизулиясса чIявусса луттирду чивчуну бур ванал. Ми, чIявусса мазурдийн таржума бувну, бивщуну бур чил хIукуматирттай. МухIаммадлул ца лакрал, Дагъусттаннал дакъа, щаллагу Совет хIукуматрал, Аьра­сатнал цIа дунияллийх машгьур дурну дур.
ХIурмат лавайсса жул шяравучу, МухIаммад! Жу цинявппагу дакIнийхтуну ина барча уллай буру увсса кьинилущал. ЧIа тIий буру вингу, ичIуссаннангу цIуллушиву ва оьрмулул хIалимшиву. Ина 100 шин хьуннин итаннав.
ГьунчIукьатIи мудангу виха дуаьлий буссар.
ГьунчIукьатIрал ккурандалул цIания Амин Аьбдуллаев

———————————————————-

gors_9Уздансса инсан

Читтурдал шяравасса МахIаммадрасуллул арс Пайзуллагь Къушиев ур шяраваллил жяматран бусрав­сса, лякьлул оьрчIан дазу-зума дакъа ххирасса ва цимирагу никирал дуклаки оьрчIачIа хIурматрайсса ххаллилсса учитель, узданну оьрму бутлатисса, яхI-къирият дусса адамина.
Гъумук 10 классгу къуртал бувну, ва увххун ур Оджоникидзе шагьрулий Ухссавнил Аьрасатнал пединститутравун. Му къуртал бувну махъ, 1964 шинал, зий ивкIссар МахIачкъалаливсса ятинталну ливчIсса оьрчIансса школа-интернатрай (№4) учи­тель-тарбиячину. Микку зий ивкIун ур 22 шинал мутталий.
— Ва ия хIакьсса, аькьлу-кIул­шилул бартлавгсса, мукъуй цIу бусса, оьрчIру ва цалла даву ххирасса тарбиячи, — тIий, буслан бикIай Пайзуллагьлущал архIал зий бивкIми.
Пайзуллагь ивкIун ур ду­ккаврил ва тарбиялул даврил завучну.
Ванал бивхьусса захIматран кьимат бишлай, 1970 шинал хIукуматрал дуллуну дур Пайзуллагьлун «Отличник просвещения СССР» тIисса бусравсса лишан. 1986 шинал Пайзуллагь ивтун ур 1730 дуклаки оьрчI ва 82 педагог усса, шагьрулий яла хъунмамур школалун ккаллисса 37-мур школалул директорну. Ванал каялувшиву дуллай ца-кIира шинава ва школа шагьрулул хьхьичIунсса школардал сияхIравун багьссар. Пенсиялийн увккун мукьахгу ва зий ивкIссар МахIачкъалаллал 51-мур лицейраву. КIулшивуртту дулаврил ххуллий бивхьусса захIматрахлу ванан дуллуссар «Заслуженный учитель РСФСР», «Учитель высшей категории», «Народный учитель Дагестана» тIисса бусравсса цIарду. Му бакъассагу, Пайзуллагь ур захIматрал ветеран.
Сентябрьданул 1-нний 50 шин бартлаглай дур Пайзуллагьлул учительшиву дуллай. ЧIалачIин дакъа ххирасса бу­ттахь ва кьини барча тIий бур ванал оьрчIру.
— Ххирасса мяммай! Ина жу хъуни бунну вилла аякьалулун лавсун, дакIнийхтуну ххира буллай. Гъилисса, кIукIлусса му­къуйну, иш багьний кьянкьашиву ккаккан дурну тарбия бунну ина жу, 3-магу оьрчIан дуллунни ларайсса кIулшиву. Цалва-цалва къатрай щябивтунни. Вил аякьалийну, ччаврийну жуя хьунни дакIру хъинсса, уздансса инсантал, ина кунма давугу, дус­талгу ххирасса, хъуниминнал хIурмат бусса, мюрщиминнал изат бусса.
Жува кулпатру бувукун, жун бувчIунни жунма нитти-буттал бувмургу. Жу жулва оьрчIалсса буллай бунугу, вил маслихIат, аякьа, кIукIлусса махъ, вил симандалул пиш жун ччан бикIай мудангу.
ЧIяру даннав вил оьрмулуву, ххирасса мяммай, ххаришивуртту, хъиншивуртту. ЦIуллу-цIакьну, зий-занай дичиннав ина Аллагьутааьланал итадаркьусса оьрмулул шинну.
Ина ххирасса арсру, душ, оьрчIал оьрчIру