Уттигъанну ттун ккарккунни ца караматсса макI. Лахъсса зунттавусса шяраву на, шагьрулия увкIун, буттал шяраваллил аьрщарай хьун бувну бия ттарлил вацIа. Га вацIа цуппагу хьун бувну бия на 8 шинал мутталий.

Шяравун хъамалу увкIсса, чIивинияцIакул ттущала дусъсса, дуккаврил элмулуву доктор хьусса дус хьунни ттул чIарав га вацIлуву. Зунттаву къашайсса личIи-личIисса рангирдал лала тIутIивгу (къячIи тIутIи, тюльпан) дия мурхьирдал дяних ххярххун.
Жу куннащал кув ватандалул бучIантIимуния ихтилатрай бунува, ттул дус Набинал (ганан мукунсса цIа дия) цакуну ца цанма дакIнин багьсса пикри аьч бувуна: «Ца инава акъа, ватандалул буруккинттарайсса инсантал цайми бакъаххай урав? Буруккинтту буну тIийрихха шагьрулий ахиратравун лавгсса, гилу яхъанахъисса жулва инсантал шийн цала гъанми паракьат буван букIлакIисса. Ми мукун букIлакIиссар, дакъа тIий миннал дакIурдиву жулла ший, зунттаву, куннасса паракьатшиву цамур кIанай», — куна.
Бунияла на кIихьра пикри буллалисса чIумал, бувчIлан бивкIунни уттигу зунттал билаят­рал тIааьншиву, шиккусса буллугъшиву, тIабиаьтрал марцIшиву шагьрурдай яхъанахъисса инсантурал дакIурдива арх хьун дурашиву. Ва иширал ттул дакI паракьат дурна. ЧIалай бур, цуманал ци учирчагу, уттигу жулва инсантал ватандалия арх буцан бувашиву.
ХIукумат буржлувссар жула шяраваллавунсса ххуллурду буван, канализация дуван, щин, чани, газ буцин, социал объектру буван. Миннухлуру жува налогру дуллалисса. Гания гухунмай оьр­му бутан бюхълахъисса хIалурду хIукуматрал хIасул дурсса чIумал, тIутIайх бичлантIиссар жулва зунттавусса оьрму. Билаятрал бакI дургьуминнан жулвамур оьрму ххуй бувансса пикрирду ччя-ччяни хIасул шаванссар тIисса умуд къакьукьинну.
ХIажимурад ХIусайнов