Ларгсса нюжмардий Лакрал райондалийн бувкIун бия ДР – лул прокурорнал хъиривчу, юстициялул хъунама советник ХIамидов АьбдулхIамид МахIмудхIажинал арс ва ДР – лул прокурорнал агьали кьамул байсса ва миннал аьрзри ххалбигьайсса хъунама кумагчи МахIаммадов АхIмад МахIаммадович.

Миннал аьрххилул мурад бия Лакрал ва Ккуллал районнал агьали кьамул бувну, миннал суаллансса бувчIинбавуртту дулун.
Микку гьуртту хьунни кIирагу районнал прокурор Светозар Оьма­ров, Лакрал райондалул бакIчи Юсуп МахIаммадов, Ккуллал райондалул бакIчи Сяид Сулайманов, мировой судья Мирза Нажаев.
Цала –цала даврийн багьай­сса суаллу буллуна Лакрал райондалул финансирдал отделданул хъунмур Аьйша Амирхановал, ЗАГС- рал хъунмур Изольда ХIажиевал, нотариус Майсарат Учуевал. ЦСОН – далул директор Щурпаев Шяпинал буллуна идарарттай зузалт чан баврийн багьайсса суал. КIулшиву дулаврил управлениялул каялувчи Явсупи ХIамзаевлул цIувххуна шагьрурдая оьрчIру районнал школардайн кьамул баврия. Гъумучиял шяраватусса МВД – лул ветеран Эфендиев Султаннул гьаз бувна аьрали иширттаву гьуртту хьуминнансса хIаллихшиннардая. Ккуллал райондалия увкIсса Амучиев Кьурбаннул цIувххуна учительтуран дагьайсса коммунал хIаллихшиннардая.
Ва кьини ДР – лул прокурорнал хъиривчунал ва хъунама кумагчинал кьамул увуна 13 инсан.
ДР – лул прокурорнал хъиривчу АьбдулхIамид ХIамидовлул бувсунни агьалиная прокуратуралийн букIлакIисса аьрзри ччясса мутталий ххалбигьаву мурадрай ва зия дурсса ихтиярду цила чIумал аьч даву мурадрай республикалул прокурорнал хIукмулийн бувну, кIантту-кIанттурдайва мобильный­сса приемныйрду сакин бувну агьали кьамул буллай бушиву. КIилчинмур дачIишинай ва хьуну бур цалчинсса аьрххи. ХьхьичIмур дачIишинай республикалул шагьрурдайн ва районнайн мукунмасса аьрххи хьуну бур мяйва.
Ванал кIицI лавгунни Лакрал ва Ккуллал районнал прокурор Светозар Оьмаров Дагъусттаннал прокуратуралий ххуйсса сияхIрай ушиву, муная агьалинал чулуха аьрзри бувкIсса иш цавагу къавхьушиву.