Апрельданул 26-нний Ккуллал шяраву хьунни ва шяравасса журналист, пуб­лицист Гьарун ХIасановлул творчествалун хас дурсса хьунабакьаву. Ва цурдагу хас дурну дия Гьарун Юсуповичлун 80 шин там хъанай душаврингу ва миннува сайки 60 шин творчествалун хас дурсса душаврингу.

Хьунабакьаврил сиптачиталну бия шяраваллил биб­лиотекалул зузалт ва Ккуллал 1-мур школалул лакку мазрал учительтал. Хьунабакьаврийн гьуртту хьун увкIун ия цува Гьарун Юсупович, Ккуллал кIивагу школардал гуманитар дарсирдал учительтал ва лавайми классирттал дуклаки оьрчIру. Хьунабакьаву дачин дурну бия библиотекалул хъунмур Аьйша ХIажиева ва журналистнал, чичул дус, ганал чивчумур кIулчу, цичIав лях гьан къадиртун дуккайсса Рамазан Мамаев. БакIраяту хьунабакьаву дачин дурминнал бувсуна чан-кьансса Гьарун Юсуповичлул оьрмулия, чичул, журналистнал ххуллуя. КIицI бувуна га ушиву хъунасса ватанчу. Явара мукъурттийнусса акъа, инсантал хъинну ххира­сса. Мунияту Гьарун Юсуповичлул чивчумур хIурматрай цинявннал кьамул бувайшиву кIицI бувуна.
Лакку маз лахьхьавриву цукунсса агьамшиву дуссарив Гьарун ХIасановлул чивчумунил ва жагьилсса ник тарбия дувавриву асар биян бувайшиву кIицI бувуна Ккуллал 1-мур школалул лакку мазрал учительница Умму Рамазановал. Ванил бувккуна Ккуллан хас бувсса Жабраил Къаллаевлул балай, цуппагу Гьарун ХIасановлул бивщусса цала «Дусшиврул ламурду» тIисса луттирай.
Ккуллал 2-мур школалул, 9-11-ми классирттал дуклаки оьрчIал дурккуна личIи-личIисса автортурал чивчусса шеърирдал декламацияр­тту. Библиотекалул зузалтрал бувсуна Гьарун ХIасановлул луттирдая: «Дусшиврул ламурду», «Лайкь хьусса ас-ламус», «Ттула дуснан», «Учитель, аьлимчу, ватанчу» тIисса ва цайминнуятугу.
Гьарун ХIасановлул «Ил­чи», «ЧаннацIуку», «Ххя­ххабаргъ» кказитирттай, республикалул зумунусса лакку мазрай буккайсса журналлай дурксса макьалардая, радиолувух дурсса репортажирттая гьарта-гьарзану ихтилатру бувуна Ккуллал 2-мур школалул директор Кьубанчи Ризвановлул, Ккуллал 1-мур школалул оьрус мазрал учитель Юсуп ХIажиевлул, Ккуллал 1-мур школалул тарихрал дарсирал учитель Адам МахIмудовлул, суратру дихьу Сиражу­ттин Кьурбановлул, Гьарун ХIасановлущал ца классраву дуклай бивкIсса БатIи Аьбдуллаевал ва цайминналгу.
Цинявннаяр махъ Гьарун Юсуповичлул барчаллагь увкуна ва хьунабакьаву хIадур дурминнахь ва цала канила дуркмур ххирану душиврия. КIибавчIуна ванал цала лавгмунил ва хIакьинусса оьр­мулул чулинмайсса дакIнил кьамул буллалимуниягу. КIицI бувуна жагьил тарбия увавриву ца мазра-матIра учаву дакъагу, чIявусса затру ишла буван багьлай бикIайшиву. Учиннуча шяраваллил аьдатру, багьу-бизу ва культуралущал дархIусса къуццутIавуртту.
Хьунабакьаврил жям дуллай, Ккуллал районда­лул администрациялийсса информационно-ана­литический отделданул хъунама Мамаев Рамазаннул барчаллагь увкуна ва хьунабакьаву дуван дакIнин багьминнахь ва цахьва Гьарун Юсуповичлухь.
— Укунсса хьунабакьавур­ттал гьану бизлазиссар ватан ххирану ялун нанисса ник тарбия дувавриву, шяравалил миллатрал культура хъиннура гьарта-гьарзану кIул хъана­хъавриву, — увкуна ванал. КIицI бувуна укунсса хьунабакьавуртту дуллан аьркиншиву школардайгу, клубирттавугу, чIявусса инсантал бавтIсса кIанттурдайгу.
Гьарун Юсуповичлул кIицI лавгуна, Аллагьнал кабакьирча, мудангу цува хIадуршиву цала шяравачувтуращал ва Ккуллал райондалул жяматращал хьунаакьин.

Лажин хIадур
дурссар ХIажимурад ХIусайновлул