Тамаша бизаймур ялагу бия: Пьер Броше аьрасатлувтураннияргума Аьрасат ххирасса, агьалинал тарих, аьдатру, культура кIулсса ведущий ушивугу, Аьрасатнал миллатирттаясса передачартту кьатIаллил билаятраясса инсан дуллай ушивугу. «Аьрасат – ттул оьрмулул хъунмур бутIар. На чIярусса шиннардил хьхьичIва Аьрасатнах эшкьи хьусса инсанна, му ттула ччаврия буслай ура ттула программалуву», — учай Пьер Брошел. Му икъавсса кIану бакъар: Ураллайн, Чукоткалийн, Зунттал Алтайрайн, Якутиянавун. Гьаннайсса, Аьрасатнаву буцири агьалинал аьдатирттая, тарихрая, багьу-бизулия хавар бусса ур. «Россия, любовь моя!» проект­рал мурадгу бур агьалинал культура, аьдатру ядавриха зузисса инсантурая бусаву. ХьхьичIва бавуна ттун му передачалул съемкарду дай группа лакраясса передача хIадур дуллай бушиву. Лях гьан къаритан хъирив багьну бивкIра. Вана май зурул 11-нний гъирарай ххал дував лакраясса передача. Бувсунни 1989 шинал переписьрайн бувну, дунияллий 120 азара лакку инсан ушиву. Шиккува кIицI лаган ччива ттулла ххаришивугу: 2002 шиналмур переписьрайн бувну лак 156 азара инсан хъанай ур. Ва передачалуцIун бавхIуну тIий бакъарача, тания мукьахгу лак гьарза хьухьуви тIисса тамахIрай кIирагу переписьрал хIасиллу цачIу дихьлай бура. Пьер Кристиан Брошел суаллахьхьун жавабру дуллай, лакрая буслая ия тарихрал элмурдал доктор, Аьрасатнал элмурдал академиялул Дагъусттанналмур элмийсса центрданул археологиялул ва этнографиялул институтрал отделданул хъунама МахIаммадхан МахIаммадов. Миннал ихтилат­рал лях-карах ккаккан дунни «Лакцы. Огонь в крови», «День села Цовкра – 1» тIисса передачарттавасса сюжетру. Хъунмур сюжет дия цIувкIуллал пагьламантурал магьирлугъран, миннал аьдатирттан, канил пагьмурдан хас дурсса. ЧIярусса шиннардий шяраваллил культуралул къатлуй каялувшиву дурсса, пагьму бусса къавтIала, балайчи Асланбагов ХIасан-ХIусайн цIанихсса буттукьру бувур. Мунал цала бувсса буттукьригу ккаккан бунни, бувсунни буттукьри байсса куц. ЦIувкIуллал пагьламантурал школалий каялувшиву дуллалисса Рамазан ХIажиевлул тIурча, мюрщи оьрчIругу хьхьу­ттай къавтIутIи бувну, бувсунни хьхьуттайх лахъултрал магьирлугъ цIулаган дувавриха чялишну зий бушиву. Аьлимчу МахIаммадхан МахIаммадович буслай ия ЦIувкIрав дакъа хьхьу­ттайх лахъаврил магьирлугъ лагма-ялттусса шяраваллаву дакъашиву хIисавравун ласунсса хIучча бушиву. Къаккавкнал ххал дувара интернетраву «Культура» телеканалданий «Россия, любовь моя!» тIисса проектрал лагрулуву «Древняя земля лаков» тIисса передача.