Ларгсса нюжмар Миллатирттал библиотекалун хьунни ххуй-ххуйсса, дакIний личIансса батIавурттал авадансса.
Дагъусттаннал культуралуву хъунмасса бутIа бивхьусса мусил усттар Манаба МахIаммадова дакIнийн бувтсса хъиривмур кьини библиотекалувун Москавлия увкIсса жула жагьилсса шаэр Тимур Раджабовлущал кIул хьун ва мунал творчествалул вечерданий гьуртту хьун чIявусса халкь бавтIун бия. Укунссара творчествалул вечер сайки ца зурул хьхьичI сакин дурну диркIссар Москавуллал Миллатирттал къатлувугу.

Залму АьбдурахIманова
Миллатирттал библиотекалуву шаэрнащалсса хьунабакьаву да­къасса, ванал Москавлийсса дустурал кумаграйну итабавкьусса луттирал презентациягу хьунни.
Тимурдул цала цалчинсса шеърирду чивчуну бур оьрмулул 19 шинаву. Ва ппурттуву шеърилугъравун дахьва ша ласласисса жагьил дуклай ивкIун ур ДГУ-лул филологиялул факультетрай. Цаппара хIаллава дуклан лавгун ур М.Горькийл цIанийсса Литературалул институтравун. Ванан шивун уххан рекомендация чирчуну дур жула хъуна­сса шаэр Расул ХIамзатовлул. Тимур ур Ю. Хаппалаевлул цIанийсса премиялул, «Серебряный стрелец -2007» Лос –Анджелеслив дувайсса миллатирттал дянивсса конкурсрал ва цаймигу форумирттал ва фестиваллал лауреат. 2006 шинал бувккун бур «Озорное вино» тIисса ванал шеърирдал цалчинсса лу. Тимурдул назмурду рищайссар Аьрасатнал, Европанал ва США-нал хьхьичIунсса литературалул ва жяматий-политикалул журналлай ва кказитирттай.
Ва кьини жагьилсса шаэрнащал кIул хьун ва ванал шеърирдах вичIидишин вечерданийн бувкIун бия дагъусттаннал литературалух гъира лекъавшсса, мунийн вихшала-умуд къакьувкьусса, уссурссу кунма бавкьусса публика. Залданувун халкь букIлай, цала-цала кIанттурдай щябикIлай, шаэрначIан гъан хъанай, аьла-ссалам буллай буна чIюхлай бия Тимур Раджабовлул мукъурттийсса аьрасатнал балайчитурал щаллу буллалисса балайрду.
Творчествалул вечер тIитIлай ва шиккун бувкIсса хъамал жагьилсса шаэрнащал кIул буллай, Дагъус­ттаннал печатьрал ва информациялул министрнал хъиривчу Миясат Муслимовал кIицI лавгунни, Тимурдуя мяйжаннугу гьунар ххисса, ттигу цимилгу жува хIайран бансса, хъунмасса, чаннасса ялунбучIантIимур бусса шаэр хьунтIишиву.
«Укун пагьму-гьунар бусса жагьилтал бусса Дагъусттаннал ялунбучIантIимур цIакьсса, хъинсса умуд бишин буллалисса бур.
Тимурдул гьунар, хIарачат сававну Москавлив хьусса шадлугъгу махъ бакъа жува цачIун буллали­сса культуралул ламуну хьуссия. ЦIанагу жува циняв ванал лагма лавгун, ца кулпат кунма буру Тимурдул кьини хъун дуллай. Жува мудангу ххари шару жуватува гьунар бусса цу-унугу увккун, Дагъусттан ххуй чулий кIицI лаган савав хьуная. Тарихрал майданнив буккан чIунссар культуралул халкьуннан. Минналли сакин дан аьркинсса халкь цачIун бансса ккуранну.
Тимурдул хьхьичI тIивтIусса хъунмасса ххуллийнгу тIайлабацIу чIа тIий жувару буккан аьркинсса. Цанчирча ванал гьарцагу шеъри бур гьарцагу букку язи увгьуну чивчусса, мунан хасъсса», — увкунни ванил.
Ихтилатирттал дя-дяних Тимурдул бувккунни цала луттиравасса язи бувгьусса шеърирду. Вайннуву ттунна асар хьуми дия «Я — Советский солдат» ва «Ниттихь» тIими назмурду.
КIилчинмур назму дурккуну мукьах Миясат Щайховнал бувсунни, шиккун цила арснащал бувкIун бушиву шаэрнал нинугу. Ванал нину Раджабова Зумруд Сиражуттиннул душ бур Гъумучатусса.
Ттущал хьусса ихтилатраву ванил кIицI лавгунни, цув хъинну пахрулий, ххарину ва барчаллагьрай бушиву укун цила арс лахъа-хъун увсса гьарнайн.
«Уттинин ттула арсная жагьил­сса шаэр хIисаврай ттун къамуксса чIявусса затру кIулну бивкIун бур. Шикку хьусса ихтилатирттава бувчIунни ттула арс вайксса шиннардий хIазран къаивкIшиву цала ялув зий, хIарачат буллай. Барчаллагь цинявннайн», — увкунни Тимурдул ниттил.
Вечер къуртал хьунни жагьил­сса шаэрнал чивчусса назмурдайсса Аьрасатнал цIаларгсса балайчи Сергей Минаевлул щаллу буллалисса балайрду итабавкьуну, дакIний личIансса суратру ришлай ва ваначIату автографру ласлай.