Февраль зурул ахирданий щалвагу билаятрал СМИ-рдал хIасиллу дуллалисса ва Аьрасатнал журналистътураву яла язими журналистътуран наградартту дуллалисса конкурсраву «Золотое перо России» тIисса наградалун лайкь хьунни жунма чIявучин гьунар бусса шаэр хIисаврай кIулсса, цIана ДР-лул печатьрал ва информациялул министрнал хъиривчуну зузисса Миясат Муслимова.

Залму АьбдурахIманова
«Золотое перо России» оьрус мазрай цалва произведенияртту чичайсса автортурал дяниву ца яла бюхттулсса литературалул премиялун лайкьсса премияр. Цимирагу ттуршукулул тарих бусса оьруснал машгьурсса литературалул тарихраву цалчин кьамул дурсса премиялун цурдагу ккаллийсса. Конкурс баян бувну мукьах хасъсса жюрилул мяйжаннугу гьунар бусса, бюхттулсса даражалий оьрус мазрай цалва хияллу кIибачIин бюхъайсса автортурал цIарду язи дугьайссар.
Жулла республикалий уттинин ва премиялун лайкь хьуну бивкIссар Дагъусттаннал Халкьуннал шаэр Фазу Аьлиева. Вана утти бюхттулсса сияхIраву жула Миясат Муслимовал цIагу ххи хьуну. Премиялун лайкь хьуну бур, ванил хьхьичIрасса публикациярду цачIун дурсса, «Испытания судьбы» ва «Путешествие на Кавказ» тIисса, оьрус миллатрал учительница Эльвира Горюхинал хаварданиясса публикация дусса «Диалоги с Данте» тIисса луттирду.
Редакциялул ва жула бу­ккултрал цIания барчагу буллай ва бюхттулсса премиялущал, журналистътурал ккурандалуву сийлийсса шадлугърая, аьрххилия ва цурда премия ласаврил асардая цIухху-бусу бан Миясат Муслимоващал на хьунабавкьура.
— Миясат Щайховнай, барча буллай му бюхттулсса, мяйжаннугу вила захIматрайну, вила гьунарданийну хIалал дурсса наградалущал, цIуххин ччива цукун бювхъуна Аьрасатнал даражалийсса мукунсса конкурсравух гьуртту хьун дакIнийн багьан?
— Барчаллагь хъунмасса. Мяйжаннугу, укунсса даражалул наградалун нава лайкь шаврия пахру къабагьлай бакъар къаучинна. Цанчирча тукун бусравсса конкурсраву навагу гьуртту хьуну, тукунсса бусрав­сса шадлугърай ттула цIагу баян баврия, ттунмагу билаятрай бур кусса, сий дусса журналистътал бавтIсса кIанай махъ лахъансса мутта бирияврия ххарину, рязийну бура.
ЦIубакIрай кIицI лаган ччива Дагъусттаннал Журналистътурал союзрал хъунама Аьли Камалов хъинну чялишну зий ушиву Аьрасатнал Журналистътурал союзращал цачIу. Хъунмасса хIарачат буллай ур Аьли АхIмадович дагъусттаннал журналистика ва гьунар бусса журналистътурал цIарду тийх машгьур дуллай. Мунал хIарачатрайну Москавлив ва цаймигу регионнай хъинну ххуйну кIулну бур республикалул СМИ-рдал тагьардания. Махъ ппурттуву Аьли Камаловлул сипталий жулла республикалийгу, мунил кьатIувгу Аьрасатнал цIадурксса журналистъталгу гьурттусса батIавуртту цагу-кIирагу къархьунни. Цаппара шиннардил хьхьичI, Сулиета Кусовал ва Аьли Камаловлул сипталий, Москавлив хьуссия ттул «Диалоги с Данте» тIисса луттирал презентациягу. Миккува на хъамаллурайх бавчIуссия хьхьичIва буккан бувсса «Испытания судьбы» тIисса ттула личIи-личIисса публикациярдал лугу.
Та презентациялийн бувкIуна Аьрасатнал Журналистътурал союзрал председатель Всеволод Богданов, союзрал секретарь Павел Гутионтов ва МГУ-лул журналистикалул факультетрал декан Елена Вартанова. Луттирду бавчIуну цаппара хIаллавату ттун хIисав хьуна Всеволод Богдановлул лу ххилтIу буллай. Цахьхьунма махъ лахъан ихтияр дуллукун, ганал увкуна: «Жува чув-бухьурчагу сукку шару агьамсса суаллу ххалбигьлай. Миясат МуслимовачIа тIурча вай жула циняв суаллансса жавабру дур ва луттираву», — куну, ттул публикациярттава цаппара ххару бувккуна. Цаппара гьант­рава Журналистътурал союзрал къатлуву ганал кIицI лавгуна цув хъинну махIаттал-хIайран увшиву ттул луттирал ва чара бакъа ва конкурсрайн була куна. Мукун ганал учирчагу, тIайлану бусан, на къасивсуссияв конкурсрайн лу булун. Амма дакIниву ххари­сса асарду хIасул хьуна. Муния мукьах цаппара шиннугу ларгуна. ДукIу Москавлив Аьрасатнал Журналистътурал съездрайн лавгсса кIанай Журналистътурал къатлуву жучIан гъан хьуна Павел Гутионтов. Микку муналгу суал буллуна: «Лу конкурсрайн циван къубуллай бура?» — куну. КIира шин ларгун мукьахгу вава суал хIазран буллай бакъахьунссархха куну, на Аьли АхIмадовичлущал пикри бувссия конкурсрайн булун лу. Амма ттун къаххива «Диалоги с Данте» тIимур лугу конкурсрайн буккан бувансса. Мадара чIунгу ларгун, февраль зурул дайдихьулий ттучIан Москавлия оьвкунни, цив республикалул каялувшиннарайн баян бан тIий бушиву на наградалун лайкь хьушиву ва му дулунтIисса шадлугърайн гьан бувара тIий. Му хIалатраву цайминнан ттула ххаришивугу кIул дан къахъанай, ххишала бакъа ххари хьуссияв. Цанчирча, Москавуллал ттул пагьмулун, хIарачатран бивщусса кьимат мяйжаннугусса буну тIий. ЧIивисса бунугу щак багьансса кIану къалякъин тIий буну тIий. Шикку бивщусса кьиматраяр тийхмур ттуршли лахъсса кьиматран нава ккалли байну тIий. Цанчирча гьарцагу дакIнийхтуну зузинан цахра дурсса къулагъасрал гуж булайну тIий, гьавас бутайну тIий.
Та аьрххилий ттущал уссия Аьли Камалов ва «За профессионализм» тIисса номинациялуву наградалун лайкь хьусса «Дагестанская правда» кказит­рал хъунмур редактор Бурлият Токболатовагу.
Жу бивкIру тийх Дагъус­ттаннал прессалул вакилтал хIисаврай наградарттан лайкь хьуми.
Хъунмасса гъира бия тукун­сса шадлугърай гьуртту хьун, цалчинъяв на навагу тикку гьуртту хъанахъисса.
Цурда церемония дия Миллатирттал дянивсса машлул Центрданул уттизаманнул идаралуву. Чун бургарчагу, журналистикалуву машгьурсса, цIа ларгсса инсантурай я бацIайва. Гужсса публика бия.
«Золотое перо» номинация баян бувну, гьарма сахIналийн уклай ия цала-цала номинациярдаву ххув хьуну награда ласун.
МГУ-лул печатьрал СМИ-рдал кафедралул хъунама Начинскийл ттул цIа учин хьхьичI: «Жунна цинявннан дакIний дикIантIиссар «миллатирттал литература» тIисса калима. ЦIана къаишланугу, му литература яхьуну чIалай дур хIакьинусса кьинигу. Вана ва чIиви-кьивисса, амма хъунмасса гьунар бусса хъамитайпа сававну му яхьуну душиву тасттикь хъанай бур» куну, ттул цIа баян дуруна.
— Интернетраву ва журналистътал бавтIсса гьар кIанай ина тикку увкусса махъру тикрал буллай, хъинсса махъ лавхъун бур тIий цIарду дуллай бур. Тукунсса публикалул хьхьичI учинмур хIадур бувссиявкьай ягутайксса бюххансса махъру тиккува хIасул хьунав?
— На тиччаллил тагьар кIулну диркIссания, таниннингу лавгун бивкIссания, бюхъайва ваниярвагу гужсса, бюххансса, Да­гъусттан дакIний личIансса махъ лахъан. Мунияту махъ лахъан ихтиярдагу дулайшиву къакIулсса на цикIуй хIадуршинна къадурну буккан багьуна. Премия ласун нанийни гьанавиххишиву дакъая къаучинна. Амма махъ лахъайни, Дагъусттаннаясса, Ккавкказуллаясса чIу баян бан аьркинссархха тIисса пикри бакIравун бувххуна.
Увкуссия жула алвагьсса билаятрал дазу Жириновскийл рирщуний дакъассарча, зул , журналистътурал, кIиссурттал клавиатуралий датIайсса макьаларттал биялдаралу дуссар куну. БувчIин бувссия жула Ватандалул кьадар, хIакьинусса ва гьунттийсса кьини журналистналгу биялдаралу душиву. Ялагу бувчIин бувссия Ккавкказуллал халкьуннал мяйжаннугусса аьрщарай Сочилий уттигъанну Олимпиада тIитIлатIисса шадлугърай Ккавкказуллал халкьуннал культура ккаккан къадуршиву. Ххи бувссия утти зу, журналистътурал, му «гъалатI» бакьин бан аьркинссар, Ккавкказуллал авадансса культурагу, тарихгу бушиву зу баян бан аьркинссар куну. Мукун учайхту залданувуцири хъатру ришлан бивкIуна. Церемония къуртал хьуну махъ чIявусса халкь гъан хъанай, барча буллай, цIухлай бия.
— Барчаллагь, Миясат Щайховнай! ЦIуллушиву дулуннав ванияр гихуннайгу вихьхьун вила дакIниймур дузрайн буккан бансса. ТIайлабацIу баннав.