Лакрал райондалий аьдатравун багьну бур Ниттил мазурдил кьинилун хасну лакку маз дишайсса учительтурал конкурс. Гьашину му конкурсрай гьуртту хьунни: АьбдурахIманова Жамила (Гъумучиял школа); ЦIаххаева Сивана (Щардал школа); Кьурбанова Бадрижат (ГьунчIукьатIрал школа); ХанмахIаммадова Зубайдат (Карашрал школа).
Конкурс сакин хьуну бия вай номинациярдая: тIиртIусса дарс; «Моя педагогическая концепция» тIисса папкардал презентация; хобби.
ТIиртIусса дарсру дирхьуна Гъумучиял школалий ва лицейраву.
ЦIаххаева Сиванал Щардал школалий лакку мазрал дарсру дихьлай хьуну дур тамансса шинну. Ванил дарс дихьлахьисса оьрчIру гьарца шинал чялишну гьуртту шай райондалул дянивсса лакку мазрал ва литературалул олимпиадарттайгу, личIи-личIисса конкурсирдайгу. Бугьай хьхьичIунсса кIанттурду. Ванил дарс дирхьуна 9-мур классраву. Му дия лакрал шаэр, журналист Руслан Башаевлул оьрмулун ва творчествалун хас дурсса. ХIадур дурну дия шаэрнал луттирдал выставка, экрандалий ккаккан буллай бия шаэрнал лакрал 99 шяраваллин хас дурсса «Буттал улклул чарттал чаннацIуртти» тIисса передачалувасса бутIри.
Кьурбанова Бадрижат бур байбихьулул классирттал учительница. Лакку мазрал дарсру дихьлай ванил хьуну дур шанна шин. 11- мур классраву дихьлахьисса лакку мазрал дарс дия числительное лахьлахьисса. Лакку мазрал дарс дишавриву личIину хъунмасса опыт бакъахьурчагу, ванил дарс дия хъинну авадансса. Ишла бувну бия компьютер, интерактив доска, жура-журасса карточкарду. Ябувцун бакъая фольклорданиягу – числительное хIаласса учаларттан хасъсса давуртту дуллуна оьрчIахьхьун дан.
Школалий зузисса ряхра шинал дянив ХанмахIаммадова Зубайдатлун лавхьхьуну бур райондалул лагрулийсса давурттугу ларайсса даражалий дуллан. Декабрь зуруй Лакрал райондалул администрациялий ва буссия Руслан Башаевлул юбилейрал мажлис бачин бувну. Таний Зубайдатлуй цинявннал дакI даркьуна. Ванилмур дарс дия лакрал шаэр МахIаммад-Загьид Аминовлул творчествалун хас дурсса.
Аьбдуллаева Жамилал дарс дия МухIуттин Чариновлул «ХIабибат ва ХIажияв» тIисса пьесалун хас дурсса. Дуклаки оьрчIал ккаккан бувуна пьесалувасса бутIа. Жагьилсса бухьурчагу, цилла давугу дакIнийхтуну ххирасса, лакрал литературалух ва культуралух баччибакъулшиву дакъасса пишакар бушиву ва ца дарсирайнугума чIалай бия.
«Моя педагогическая концепция» тIисса папкардавун учительницахъал цачIун дурну дия тIиртIусса дарсирдал ва классрал кьатIувсса дарсирдал планну, конкурсирдайнсса ва конференциярттайнсса докладру, дарсирдай ишла дайсса материаллу, олимпиадарттай ва личIи-личIисса конкурсирдай кIанттурду бувгьусса дуклаки оьрчIал грамотарду, мероприятиярдай рирщусса суратру.
Махъва-махъсса номинация бия цалва хоббилия бусан. ЦIаххаева Сиванал ччергъилттухун увкуна Руслан Башаевлул мукъурттийсса, халкьуннал макьандалийсса балай.
Кьурбанова Бадрижат тIурча бусса бур ххаллилсса дарзи – цилла дурурххусса янналуву бия. Му бакъассагу, царай эмаратну гулавати щавшсса суратругу дия ванил рамкардаву дирхьусса.
ЯбатIин къашайсса дия ХанмахIаммадова Зубайдатлул жанграй щарщусса тIутIивгу. Цалла касмурду вай кIивагу учительница лахьхьин дуллай бур кружокирттай дуклаки душарангу.
АьбдурахIманова Жамилал тIурча цилла дирхьусса суратру ишла дайсса дур дарсирдайгу. ОьрчIругу дихьлахьи байсса бур лахьлахьисса темалун хас дурсса суратру.
Конкурсрай гьуртту хьусса цинявппагу учительницахъал дарсру миллатрал дакI ниттил мазраву душиву дуклаки оьрчIан бувчIин бан бюхъайсса, миннаву буттал улклухсса ччаву куртI дуллалисса диркIшиврий чIурчIав дуллай бия конкурсрал жюрилувусса райондалул КIулшиву дулаврил управлениялул методистал: Абакарова ПатIимат ва Аьлиева Гьумаюн; Гъумучиял лицейрал завуч Куяева Рая; ШавкIуллал школалул завуч ва лакку мазрал дарсру дихьлахьисса Эфендиева Земфира; Хьурттал школалий лакку мазрал дарсру дихьлахьисса Эфендиева Гулбика. Райондалул конкурсрал хIасиллайн бувну, республикалул конкурсрай гьуртту хьун тIайла буккан ккаккан бунни Щардал школалул учительница ЦIаххаева Сивана.
ХIадур дурссар
Зулайхат Тахакьаевал
