Тталат кьини цIу миналий_сса ЦIуссаккуллал школалий ларгунни декабрь зуруй щалагу билаятрай кIицI ларгсса Аьрасатнал Вирттаврал кьинилун хас дурсса тIиртIусса дарс.

А. Аьбдуллаева
П. Рамазанова
Ва дарсирал мурад бия вирттал эбратну ккаккан буллай, дуклаки оьрчIаву ватандалухсса ччаву тарбия даву, ми террорданул ва экстремизмалул ххуллия арх баву. ЦIуссаккуллал агьулданучIа эбрат ласунсса виртталгу бур, хIайп, бяйкьу ххуллийх лавгмигу бур. Укунсса дарсру дишавугу цила чIумал дурсса хъуннасса агьамшиву дусса давуну хъанай дур.
Ва дарсирай гьуртту хьун оьвкуну бия 1999 шиналсса дяъвилул иширттаву Къучагъшиврул Орден лайкь дурсса, хIакьинусса кьини ца яла захIматмур структуралий каялувшиву дуллалисса цала шяравучу Муслим Даххаевлуйн.
Мукунма шикку гьуртту хьун бувкIун бия ЦIуссалакрал райондалул администрациялул хъунаманал заместительтал Аьли Исрапилов ва Гаирбек Мусаев, балугъравун къабивминнал иширтталсса байсса ЦIуссалакрал РОВД-лул зузала Марина Къапланова, ЦIуссалакрал кIулшивуртту дулаврил управлениялул хъунаманал хъиривчу Малика Акаева ва м.ц. Школалул директор Сагъират МахIаммадовнал дарсгу тIиртIуну, махъ буллунни Муслим Даххаевлухьхьун. Цалва ихтилат­раву Муслим МахIаммадовичлул бувсунни дуклаки оьрчIахь тай Ватандалийн кьини дурксса аьратталсса 1999 шинал гьант_рай цукун къучагъну дуручлай бивкIссарив цала аьрщи чапхунчитурая ЦIуссалакрал РОВД-лул зузалт, райондалул агьлу, Аьрасатнал саллатI ва хIаписартал, бувсунни Липецкаллал ОМОН шалклува буккан буллан багьсса куц. ОьрчIру пахъ багьну вичIилий бия виричунал бусласимуних. Ва ихтилат буллалиссаксса хIаллай ккаккан дуллай бия та чIумал ларсъсса суратру, тай иширттал лахIзарду.
— Хъинну кьурчIи бизлай бур, къащи хъанай дур хIакьину жулла республикалий жула жува литIлатIисса баян къабувсса дяъви най бушиву. Гьарица кьини тIиссакссагу, куннал ку литIлай бур жагьилсса органнал зузалт ва бяйкьу ххуллийн бувксса аргъиравусса жагьилтал, хартI хьуну най дур жулла генофонд. Язухъ бур лякьлул дард ккаклакисса ниттихъай. Язухъ бур лякьлул оьрчIацIа хьушиву къагьану, дуччин жаназарагу къадуллали­сса нитти-буттай. Му хъуннасса хIасратри.
Цуксса къаччайнугу, жулла шяравугу бур му ххурххуппалу­хьхьун биривсса. Мунияту шаймур бан аьркинссар терроризмалун ххуллу кьукьин, му ххуллийн букканнин бацIан бан жулва жагьилтал. Му ххуллийн бувкмигу куртIнивун бухханнин мичча бу­ккан бан хIарачат бан аьркинссар. Му давугу ца ихтиярду дуруччай органнал дуллай дан къашайссар, агьалиная кумаг бакъахьурча.
Жухьва цинявннахь хIакьину хъунмасса бияла буссар жула жагьилтал, ялун нанисса ник ва балаллул ххурххуппалухьхьун бириян къабитан, — увкунни Муслим Даххаевлул.
Мукунмасса, дуклаки оьрчIру террорданул ххуллия арх баву мурадрайсса, ихтилатру бунни Аь. Исрапиловлул, Г. Мусаевлул, М. Къаплановал, М. Акаевал. Гьарица ихтилат буллалима ия ва хIакьину куннасса мероприятияртту, хьунабакьавуртту ччя-ччяни дулларча ххуйну хьун­ссия, вайннуя хъунмасса хайр бикIанссия тIий.
Хъирив дуклаки оьрчIал бувсунни Даххаевлул оьрмулия, дурккунни назмурду.
Ихтилатру къуртал хьуну махъ, дуклаки оьрчIал суаллахьхьун жавабругу дуллуну, Даххаевлул пишкаш бунни ЦIуссаккуллал школалун телевизор ва проектор.
Спортрал бяст-ччаллаву ххув хьусса, Аьрасатнал чемпионатирттай хьхьичIунсса кIанттурду бувгьусса дуклаки оьрчIан Зураб АхIмадовлун (1-сса кIану), АхIмад Маммаевлун (2-сса кIа­ну), Адам Рамазановлун (3-сса кIану), мукунма Дагъусттаннал чемпионатрай 1-сса кIанттурду бувгьусса Ч. МахIаммадовлун, Х. МахIаммадовлун ва А. Дурнаевлун ванал дунни арцуйнусса бахшишру. Школалул учительтурал коллективрал ва дуклаки оьрчIал чулуха Муслим Даххаевлунгу бахшиш дунни барзул статуэтка. Хьунабакьаву оьрчIангу, хъамаллурангу дакIний личIансса хьунни.