Январьданул 20-нний ДР-лул Строительствалул ва ЖКХ-лул министерствалул ххалдиргьунни Дагъусттаннал бакIчинал Халкьуннал Мажлисрайнсса Рисала. Тикку ихтилат буллай, строительствалул ва ЖКХ-лул министр Муса Мусаевлул бувсунни республикалул бакIчинал министерствалул хьхьичI бивхьусса масъаларттая. Ганал мукъурттийн бувну, 2014 шинал ми масъаларттах ляличIисса къулагъас дуллан аьркинни, Республикалул бакIчинал увкусса куццуй, респуб­ликалул бакIчинал тIалавшин дур шагьрурдай къатри дуллалисса чIумал архитектуралийн чул бивщуну дуллан. «Буниялагу, жунма чIявуну хьунабакьай мукунсса ишру: чIявузивурдайсса къатри дуллалийни къатрал залунначIа къабикIай проектирдал ва сметардал документру. Мунияту ми масъаларттал ялув бацIлан аьркинссар кьянкьану. Муса Мусаевлул тапшур бунни цалва зузалтрайн, циняв шагьрурдай ва хъунисса шяраваллаву къатри даврил (градостроительные) планну дикIан аьркиншиву ва планнал тIалавшинну дуручлан аьркиншиву. «ЦIана тIурча планну чIявусса шагьрурдалгу, шяраваллалгу дакъари. Га чара бакъа аьркинсса документри, генплан дакъа цавагу шагьрулийн инвестор къаучIайссар. Жулва хьхьичI масъала бивхьуну бур шагьрурдайн инвестортал кIункIу бан, му масъала щаллу буван аьркинссар», — увкунни министрнал.
Муса Мусаевлул мукунма тIалав бунни ЖКХ-лул давурттугу низамрайн дуцин. Ганал увкусса куццуй, ЖКХ-лул бутIуву унгу-унгусса дахханашивуртту дуван аьркинни инсантурал тIалавшиннугу хIисавравун ларсун.
«ДР-лул Халкьуннал Мажлисрайнсса Рисалалий Дагъусттаннал бакIчинал увкунни тIювалул – коммунал хозяйствалул реконструкциялул планнащал инсантал кIул бан аьркиншиву. Ми планну хIадур дурну дикIан аьркинссар инсантурал пикри-зикрирду гьануну лавсун. ЦукунчIавсса диялдакъашивуртту жулла давурттаву хьун дуллан къабучIиссар, цанчирча миннуйнур жулла даврин кьимат бищунтIисса», — увкунни строительствалул ва ЖКХ-лул министрнал.
Совещаниялул ахирданий ДР-лул строительствалул ва ЖКХ-лул министр зана хьунни Минстройрал хьхьичI бивхьусса масъаларттавасса яла агьаммур масъалалийн. «Республикалул бакIчинал увкусса куццуй, цинярда преступленияртту строительствалул бутIуву хъанай дур ягу муницIун дархIуну дур. Мунияту ва бутIуву дуллалисса цинярда давуртту цинявннан кIулну, аьчухну дуллан аьркинссар, яла мунил хIакъираву цукунчIавсса гъалгъарду къабикIаншиврул. Аьрщив хъапа-шапа дуллангу къабитлан аьркинссар, ми аьрщив дачIлангу къадагъа дишин аьркинссар, муния ихтилатвагу бикIан къааьркинссар, — увкунни Муса Мусаевлул.
Масъала ххалбигьавривух гьуртту хьунни, ва ихтилатру бунни, министрнал хъиривчутурал: МахIаммад Аьбдулкеримовлул, Салауттин Тагиевлул ва МахIаммад Исмяиловлул.
ХIадур бувссар ХI. Аьдиловлул