Сентябрьданул 27-нний тIивтIунни ХII Дунияллул халкьуннал инвестициярдал форум «Сочи-2013». Форумрай гьуртту хьунни ДР-лул Президент Рамазан АьбдуллатIипов бакIчисса Дагъусттаннал делегация. Вай гьантрай Сочи цаппара гьантрайсса щалва билаятрал инвестициярдал ва экономикалул дязанну хьуну бия. Гьашину форум хьунни Имеретиннал кьанив Олимпий кластерданул зуманивсса МикIирал дворецраву.
Инвестициярдал форумрай гьуртту хьунни властьрал органнал каялувчитал, паччахIлугърал учреждениярттал, хьхьичIунсса Аьрасатнал ва дунияллул халкьуннал компаниярттал каялувчитал, дипломат миссиярттал бакIчитал, цIа дурксса отраслирдал экспертътал ва ишбажаранчитал.
ЦIанасса форумрай Дагъусттаннал экспозиция дузал дурну дур 144 квадрат метра дусса кIану бувгьуну. Гьашинугу ккаккан дантIиссар Дагъусттаннал инвестициярдал бюхъурдал ва экономика хьхьичIуннай дуллалаврин хасъсса кино. Республикалул форумрайн хIадур дурну дур 76 инвестициялул предложение, миннул аьмсса багьа хьуну бур инвестициярдал 155 млрд. ва 894 млн. къуруширттал ва 44 инвестпроект 190 млрд. ва 407 млн. къуруширттансса. Миннувату 33 проект хъанахъиссар приоритетсса, яни республикалул лапра хъуннасса мяъна дусса.
Дагъусттаннал экспозициялул яла хьхьичIунмурну, яла яргмурну, ябацIанмурну хъанахъиссар «Пюрун байсса завод флоат методрайну баврил» инвестициялул проект. Мунил буккан буллантIиссар гьантлун 600 тонна пюрундалул, флоат методрайну. ЦIанасса ппурттуву харж дурну дур му завод буван 8 млрд. ва 334 млн. къуруширттал. Тикку мудана 70 инсан зий уссар, яла чIумуйссагу – 137. ДукIу га заводрал дуллуну дур 10 млн. къуруширттаяр ххишаласса налогру.
Дагъусттаннал стендрачIа
Аьрасатнал Премьер Д. Медведев гьуртту хьунни Дагъусттаннал инвестициярдал проектирдал экспозиция ккаккан даврил батIаврий. Хасну ганан ккаккан дунни 4 инвестпроект.
Цалчинмур инвестпроект «РусГидро» в Республике Дагестан», «Монтаж агрегата на Гоцатлинской ГЭС» ОАО ккаккан дуллалисса ппурттуву тIайланмасса телемост хьунни гидроэлектростанциялул зузалтращал. Ихтилат хьунни ГьуцIалтIиял ГЭС-раяту. Га буллай байбивхьуссар 2007 шинал «РусГидро» ОАО-рал.
КIилчинмур проект дур «Приоритетная программа развития сельского хозяйства с внедрением современной техники и технологии в Республике Дагестан». Ва проект дуллалиссар шанна райондалул аьрщарай, дузал бантIиссар хъунмасса агропромышленностьрал кластер.
Га инвестициярдал проект дацIантIиссар 20 млрд. къуруширттан.
Шамулчинмур инвестициярдал проект дур «Авиаагрегат заводрал» гьанулий куклусса коммерциялул машинартту баврин хасъсса.
Хъиривмур проект – «Организация текстильного производства полного цикла» тIисса. Га дур Аьрасатнал Турциянал «Наргиз – Дагестан» тIисса компаниялущал хIаласса производство.
Дагъусттаннал экспозиция ккарккун, Дмитрий Медведевлул кIай проектирдан хъинчулийсса кьимат бивщунни.
Форумран хасъсса пресс-конференциялий
Октябрьданул 2-нний МахIачкъалалив журналистътуращал хьунаавкьунни «Сочи-2013» форумрай гьуртту хьусса ДР-лул машлул ва инвестициярдал министр Юсуп Умавов. Ганал бувсунни форумрал хIасиллайну чирчусса кьутIирдая. Ганал бувсмунийн бувну, цалчинмур кьутIи форумрай чирчунни АьФ-лул Экономикалул иширттал министерствалул чулухату министр Алексей Улокаевлул ва ДР-лул чулухату региондалул бакIчи Рамазан АьбдуллатIиповлул.
КьутIилий ккаккан бувсса куццуй, га документрал мяъна-мурад хъанай дур Дагъусттаннайн тIайланнасса чил билаятирттал инвестициярду дучIан даву ва кьатIаллил экономикалул иширттавух гьуртту хьуншиврул ххуйсса шартIру дузал даву.
ЧIиримур ва дянивмур бизнес кьатIаллил рынокрайн дуккан даншиврул, Дагъусттаннал ХIукуматрал кьутIи чирчуну дур «Российский банк поддержки малого и среднего предпринимательства» ОАО-ращал. КьутIилий къулбасру дурну дур республикалул вице-премьер Абусупиян Хархаровлул ва банкирал правлениялул председательнал 1-ма хъиривчу Дмитрий Головановлул.
КьутIи чирчуну дур ДР-лул ва Оренбургуллал областьрал дянивгу, га кьутIилийну бюхъантIиссар кIивагу чулухаллил машлул ва экономикалул, элмийну-техникийсса ва социал ва культуралул иширттал дянивсса арарду. Мукунма хьхьичIра чирчуну диркIсса кьутIилул хIакъираву протокол чивчуну бур ДР-ка ва Ставрополлал край хIала-гьурттуну зузаврил хIакъираву.
Форумрай мукунна кьутIи чирчуну дур «Российские сети» ОАО-рал ва «НПК Русская электроника» ОАО-рал дянив АьФ-лул электросетевой комплексрансса ттизаманнул луртан бутIри хIадур баврил ва техникалул чулуха кумаг баврил хIакъираву.
ХIадур бувссар ХI. Аьдиловлул
