МахIачкъалалив «Тачки» цIанилусса оьрчIансса комплексраву бия гьарца кьини шивун нитти-буттахъащал, уссур-ссуннащал бучIайсса оьрчIаха щала къалавхьхьусса оьрчIру – Каспийскаллал Коррекционный детский домрал тарбиячитал бувкIун. ОьрчIан ва кьинисса байран шаврил сиптачину ва сакиншинначину бия Сбербанкрал Дагъусттанналмур отделение.
Бадрижамал Аьлиева
Сбербанкрал дур цилла корпоратив ихIсаниятрал программа «Счастливое детство». Ва Программалул лагрулуву Каспийскаллал Коррекционный детский домрал оьрчIал «Тачки» РК-равунсса кIилчинсса аьрххи хъанай бия ва ххуллухмур. Цалчин вай бувкIун бур шивун 1-мур июньдалий – ОьрчIру буруччаврил кьини. Му кьини вайннан шиву муксса ххуй бивзун бурхха, оьрчIан ляличIийну шивунма ччан бивкIун бур кIилчингу. Сбербанкрал персоналданущалсса даврил отделданул начальник Лейла Аьлиевал бусаврийн бувну, шагьрулувусса цайми оьрчIансса клубрунияр, «Тачки» клуб хIалусса бур личIи-личIисса оьрмулул шиннал оьрчIру бигьалаганшиврул, муниятугу оьрчIан ва клуб ххира хьуну бур.
— Шиву цавай щябивкIун, гайми бизар хъанай къабикIай, цинявннанмагу хIаз бикIай. Ялагу, «Тачки» клубрал, жун цащава шайсса ка-кумаг бувну, жул чIаравбацIаву дувай. Масалдаран, Дарбантлиями оьрчIру бувцуну бувкIсса чIумал клоунналмур выступлениялухмур харж-хурж вайннал цайнна ларсунни. «Счастливое детство» программалул лагрулуву дан дакIнийсса цаймигу давурттив дуссар, миннувух вай кIивайвагу къатрал ремонтралссагу. Ва цимирагу шинал мутталий зузи дувантIисса программар, мукунна, гьарта-гьарза дулланну ванияр тиннай дансса давурттал дазурдугу, — тIий бур Лейла Аьлиева.
Сбербанкрал цилва бургаврилун, аякьалулун лавсун бур ва бакъассагу, ванияр хьхьичIва, 2010 шинала, Дарбантуллалмур оьрчIал къаттагу. Каспийскалиями оьрчIру бучIан нюжмардул хьхьичI «Тачкардавун» Дарбантлиямигу оьрчIру бувкIун бивкIссар. Каспийскалиями оьрчIал ялувсса шефство ва банкрал ларсун дур уттигъанну, ва шинал дайдихьулий. Уттинингу вайннал ларсун дур чара бакъа аьркинмур, библиотекалувун луттирду. ЧIал къавхьуну спортрал площадкардугу буллансса пикри бур.
Сбербанкрал Дагъусттанналмур отделениялул ялув бацIаврийн бувну, вай махъсса шиннардил дянив Дарбантуллалмур оьрчIал къатлущагу бювхъуну бур цалва материалданул ва техникалул база авадан бан, оьрчIал цIуллу-сагъшиву цIакь даву мурадрайсса цаппарасса проектругу иширайну щаллу дан.
Ва кьини Каспийскаллал оьрчIал къатлул библиотекалун Сбербанкрал буллунни оьрчIансса хъинну ххуйсса лу (Москавлив буккан бувсса) «Когда я вырасту, я стану сбербанкиром» тIисса. Ва луттираву оьрчIан бувчIинсса бигьасса мазрай бувсун бур банкрал даврия. ОьрчIан цири, жун, хъуниминнангума хIаз бивзуна ва лу, укунма къабувчIаймур бигьанма бувчIинну чивчуну бушиврийн бувну.
НахIусса ахттайнсса дуркуну махъ, оьрчIал биялсса хIаз лавсунни къавтIун бивзун, личIи-личIийсса тIуркIурду бувну, конкурсирдавух гьуртту хьуну клоунтуращал ва «Тачки» оьрчIал клубрал цаймигу зузалтращал.
