ДР-лул ЦIуллу-сагъшиву дуруччаврил министерствалул августрал 30-нний 2013 шинал итабавкьусса приказрайн бувну, Дагъусттаннай дайдирхьунни гриппрал вирусрайн къаршисса вакцинация дуллай. Ва даву даншиврул жулла республикалийн бувкIун бур 386 900 «Гриппол» вакциналул доза. Вай бавчIуну бур республикалул районнайх ва шагьрурдайх.
«Гриппол» вакциналул сакин дайсса дур цинна хасъсса, грипп къадиянсса иммунитет, оьрчIалгу, хъуниминналгу бигьану лахъайсса. «Грипполданул» ххалаххи бувсса инсан гриппрая урувччуну икIайсса ур щаллусса шинай. Ва дайдирхьусса даврицIун бавхIуну, ДР-лул ЦIуллу-сагъшиву дуруччаврил министерство буржлув буллай бур цинявппагу медициналул зузалт чIарав бацIан, кабакьин, агьалинащал бувчIин баврил давуртту дуллан, вайннуя махъаллил хьуминнан цукунсса нигьачIаву дуссарив бувчIин буллан.
Ярглул чIумал (2013-2014 ш.) ххалаххив буллалиссар 18 шиная ливчусса студентътурайн, 60 шинава ливчуминнайн, медициналул зузалтрайн, кIулшиву дулаврил учреждениярттал зузалтрайн, транспортрал, коммунал къуллугърал зузалтрайн.
ДР-лул ЦIуллу-сагъшиву дуруччаврил министерствалул хъунмур эпидемиолог ХIасанова Муслиматлул тIимунийн бувну, гриппрая буруччинсса ххалаххив бан аьркинссар чара бакъа, цанчирча, цаппараннан (ялув кIицI лавгсса инсантуран) нигьачIаву дуну тIий грипп захIматну диянссар тIисса.
— Жу «Грипполданущал» зий цалчинсса шин дакъар, мунияту ванил гриппрал ххуйсса жаваб дулайшивугу жун хъинну кIулли. «Грипполданул» вакцина жулла республикалул шагьрурдал ва районнал цIуллу-сагъшиву дуруччаврил учреждениярттайн дуркIссар, хIакинтал миннул инструкциялущал кIул хьуссар. Дайдирхьуссар вакцинациялул компания.
Багьана бакъа вакциналия махъаллил хьуминнал цIуллу-сагъшиврун бунияласса зарал биян бан бюхъайссар.
ХIадур бувссар Т. ХIажиевал
