Уттигъанну МахIачкъалалив Этнический культуралул центрдануву зун диркIунни художествалул ва этнографиялул проект «Ансамбль «Балхар» — 55 лет с нами» цIанилусса.
Му хъанай дур «Легенды Дагестана» циклданувасса цалчинсса давуну, цил мураднугу хъанахъисса тамашачитал кIул баву халкьуннал канил пишардащал, республикалул культуралул хьхьичIунсса ишккаккултращал.
Бадрижамал Аьлиева
Ва проектрал сакиншинначи ва куратор бур искусствовед, Аьрасатнал халкьуннал усттар ПатIима ХIаммадова, «Бархъал» ансамбльданул гьану бивзсса аьпа биву Къачу ХIаммадовлул душ.
Ва проектрал лагрулуву центрдануву хьунни «Бархъал» фольклорданул ансамбльданул концертгу, бархъаллал хьхьичIарасса тIахIни-кIичIулул, янна-уссал выставкагу, хъунмурчIин ХIаммадовхъал кулпатралссаннул.
Ва проект, выставка тIитIлатIисса батIаврий махъру лахълахъими кIицI лаглай бия ва ансамбльданул республикалул, Аьрасатнал ва чил хIукуматирттал лагрулийсса личIи-личIисса конкурсирдавух, фестиваллай дурсса гьурттушинна, лавсъсса дипломру, бахшишру.
Дагъусттаннал изобразительный искусствалул музейрал директор СалихIат ХIамзатовал увкуна:
— «Бархъал» ансамбльданул Дагъусттаннал, Аьрасатнал кьатIувгу тамашачитал кIункIу бувай цалла итталун дагьлагьисса яннардайну, къавтIавурттайну. Ва фольклорданул ансамбль цимилгу дуркссар Москавлив ВДНХ-лул майдандалийнгу, дунияллул халкьуннал дянивсса фестиваллайгу. Мудангу тамашачитал хIайранну личIайссар вайннал гьунардания, хьхьичIарасса бархъаллал яннардая ва къавтIавурттая, — увкунни СалихIат Расуловнал.
Театровед Гулизар Султановал увкунни:
— Жу пахрулий буру ва коллективраща цалва марцIсса чIурдугу, цалла дакIгу, къалипгу ядуван бюхъаврия. Даргиял дянив ялапар хъанай бунува, цалва мазгу, культурагу, багьу-бизугу буруччингу бювхъуну, ми никирая никирайн биян буллалаврия. ДакIний бур 1995 шинал республикалия цайминнащал архIал ва коллективгу Польшанавун лавгун, тийх циняв хIайран хьуну бивкIсса вайннал янна-калия, къавтIавурттая…
Махъру лавхъунни чIявусса цайминналгу.
Никирая никирайн гьунаргу, кIулшивурттугу дуллай най дур ва ансамбль. ДакIнийн бутан, ванил гьану 1958 шинал Бархъалав шяраваллил культуралул къатлуву бивзун бур Дагъусттаннал, Чачаннал ва Ингушнал, Къабардиннал ва Балкарнал культуралул лайкь хьусса ишккакку, халкьуннал творчество хьхьичIуннай давриву дурсса ккаккиярттахлу лайкь хьусса «Душа России» Миллатрал премиялул лауреат Къачу ХIаммадовлул. ХIакьинусса кьинигу, 2007 шинал Къачу аьпалул хьуния шинмайгу, буттал дайдирхьусса даву дуллай, хьхьичIунмай най бур ванал душру. ЦIана ансамбльдануву ур 20-ксса инсан, оьрмулул 5 шинава 70 шинавун ияннинсса, мигу, хъунмурчIин, ХIаммадовхъал агьулданиясса. Оьрмулул бугьарами хIарачат буллай бур миллатрал, шяраваллил аьдатру, культура ядавривун шайссаксса чIявусса жагьилталгу кIункIу буван. Ансамбльданул репертуардануву бур лакрал бакъассагу, даргиял балайрдугу, къавтIавурттугу.
