Сентябрьданул 7-нний ДР-лул Президентнал кIанайма Рамазан АьбдуллатIипов хьунаавкьунни Изборскаллал Экспертътурал клубрал члентуращал.

Клубравун буххайссар цIа дурксса Аьрасатнал жяматийсса ва диннал ишккаккулт, философтал ва журналистътал. Ва ххуллух бувкIунни «Завтра» кказитрал хъунама редактор Александр Проханов ва АьФ-лул ПрезидентначIасса граждан общество хьхьичIуннай даврил, инсаннал ихтиярдал советрал член Максим Шевченко, «Россия – исламский мир» стратегиялул хъиривлаявурттал центрданул президент Шамил Султанов. Республикалул каялувчинал тайннащал цачIу ххалбивгьунни Дагъусттаннал общество хьхьичIуннай шаврил, Дагъусттаннай ва Аьрасатнаву жяматийсса ва политикийсса цалийн бучIаву щаллу давриву миллатирттал политикалул бугьлагьисса кIанттул масъалартту.
Ттизаманнул Дагъусттаннал обществалул захIматнийн багьсса масъаларттая буслай, Республикалул бакIчинал яла хъунмурну ккаккан бунни властьрал ва управлениялул, экономикалул хьхьарашиву: «Мичча наниссар цинярда захIматшивуртту, миннувух диндалул террористшиврул чулухамигу. Агьалинащал гъалгъа буллай, гайннал масъалартталсса буллай цучIав акъая. Агьали – цайнува цивппа, власть — цийнура цурда дия. Билаятрал Президентнащалсса хьунабакьаврий на хьхьичIун ларсъссия цIусса управлениялул модель: республикалун арцу дуллан кIанай, Дагъусттан хьхьичIунмай буллансса институтру сакин буллан. Дагъусттаннай приоритетмур, агьаммур масъалану личIлачIиссар АПК хьхьичIунмай буллалаву. Агьамсса ххуллу-ххану личIлачIиссар мюхчаншиву дуруччаву. Муния В. Путин рязи хьунни.
Изборскаллал клубрал председатель Александр Прохановлул пикрилий, аьркинну дур хIасул дан цIусса идеология, га идеологиялущал хьхьичIунмай бачиншиврул. «ХIакьинусса Аьрасатнаву цаппарасса бур Аьрасат оьруснал билаят бикIан аьркинссар тIий. «Долой Кавказ» тIисса лозунгру баян буллай бур. Мунил хъирив гьунттий баян булланссар «Хватит кормить Татарстан, Дальний Восток, Сибирь». Му бяйкьу ххуллур. Билаят цинявннан цассар. ХIакьину Аьра­сатнан Дагъусттанная лахьхьин аьркинссар чIявумиллатру бусса билаятрай яхъанан, цалла-цалла культурагу, мазгу ябувну», — увкунни А. Прохановлул.
Максим Шевченкол бувсунни цIанасса ппурттуву республикалий дахханашивуртту хъанай душиву. «Жун чIалай бур, ми дахханашивурттал буциншиву республикалул культуралул, социал, политикалул статус. Жу шиккун бувкIру чIалачIи бан Дагъусттан Ккавкказуллал яла культура думур, гужмур, элмиймур регион бушиву. Ттул пикрилий, Ккавкказуллал гьану Дагъусттаннай бур», — увкунни ганал.
Хьунабакьаврий Дагъусттаннал бакIчинал бувсунни аьркинну бушиву Дагъусттаннайгу бан Изборскаллал экспертътурал клубрал филиал кунмасса идара.
Изборскаллал клубрал члентал Аьрасатнал регионнайн лагайссар интеллигенциялул вакилтуращал хьунабакьин. Шиккува бусан, Изборскаллал клуб сакин бувссар 2012 шинал сентябрьданий Псковуллал областьрайсса Изборск шагьрулун 1150 шин шаврил шадлугъ дуллалисса чIумал.
Лажин хIадур дурссар ХI. Аьдиловлул