Вай гьантрай жул редакциялийн бувкIунни кьатIаллил билаятраясса хъамал: Франциянаву Коломб шагьрулий яхъана­хъисса Каддур Шакер ва мунал кулпат Мадина ТIагьирова.

Машгьурсса тележурналист Ссалам Хавчаев ва мунал кулпат Жанна ттун хьхьичIрасса даврийхчIин кIулссия. Миннал оьвкуну Дарбант шагьрулийнгу лавгссияв. Дарбантуллал мэр Имам Яралиевлущал, премьер-министр Аьбдуссамад ХIамидовлущалгу хьунабавкьуру. Каддурдул миннахь жулла республикалия, агьалиная цIарду дуллалисса ихтилат бунни.

ПатIимат Рамазанова
Алжирнавасса Каддур – лак­рал куяври. Мунал кулпат Мадина, ГьунчIукьатIрал шярава­сса ТIагьирдул ва Сабиратлул душри. Сайки мукьра шинни Мадинал Франциянаву яхъанай. Дагъусттаннал университетрал филологиялул факультетгу къуртал бувну, Мадина МахIачкъалалив личIи-личIисса давурттай зий буссия, мукьра шинал хьхьичI му Франциянавун лавгуна. Тийх Каддурдущал кIул хьуну, мунан щар хьуну бур. Мадинал ниттиуссу Амин Аьбдуллаев жул редакциялий зий ур подпискалул даврилсса буллай. НиттиуссичIан бувкIсса Мадинахь на миннат бувссия Франциянавусса оьрмулия ва жучIара хIисав хьусса дахханашивурттал хIакъираву ттущала ихтилат буван жулвамур кабинет­равунгу буххира куну. Мадина мудангу хьхьичIун бурувгсса, ас-ламус бусса, дакI хъун дакъасса, аслийсса лакку душ бикIайва. Мунил ппу ТIагьир (аьпа биву) ва нину Сабират ххаллилсса, тIуллу уздансса, дакI-аьмал хъинсса бия, цилва оьрчIругу мукунма тарбия бувну бушиву исват хъанан бикIайва. Ттун ТIагьировхъал щалвагу кулпат кIулли, му ххуйсса кулпат бур. ДакI хъун къадурну, бувххунни Мадина ва Каддур жучIан.
— Сабах алхэр! – тIий ур Каддур. Таржумачишиву дуллан багьунни Мадинан цинма. Аьраб мазрай «Бивзрув!» тIий, ссалам буллай ур кунни. Гиккува лакку мазрайгу «Бивзрув, бивзрав!» учай Каддурдул. «Утти лакрал куявну кьамулссара», — учав нагу. Укун тяхъану, хIазну байбишарду ихтилатгу.
Алжирнавасса Каддур Шакер институтравун дуклан уххан увкIун ур Франциянавун. Мунал къуртал бувну бур Парижлив Медиациялул институт. Му институтгу къуртал бувну, Франциянавува авцIуну ур, зий ур консультант – медиаторну. Мукунсса пишалия хавар бакъасса ттун бувчIин бувай цала даврил бурж – бигарду цукунссарив: иш суд-диваннайн багьаннин къалмакъал хьусса инсантуран маслихIат бувну, дакьил баву, яъни консультантшиву даву. Каддурдул экономистнал кIулшивурттугу дур, Дофиннал университетраву мунал ихтиярдал экономикагу (экономика права) лархьхьуну дур.
Мадина Франциянаву цилва пишалий, оьрчIащал, зий бур, хъинну ххуйну кIулну бур ванин паланг маз. Жул шамунналагу дянивсса ихтилатгу къахьунссия, гьай-гьай, Мадинан паланг маз ххуйну къакIулну бивкIссания.
Мадина: – Жу махъ кутIа бувну кIилчин хьунабавкьукун, яъни кIилчинмур свиданиялийва учиннуча, Каддурдул ттухьхьун махъ буллуна хIалу дагьайхту чара бакъа Дагъусттаннайн биянну куну. Буллусса махъ бацIан бунни ванал, вайнна жу бувкIру ттул мачча-гъанминнащал кIул хьун. ХьхьичI ирглий жу, гьай-гьай, Алжирнавун лавгру Каддурдул нитти-буттащал, ичIувацириннащал кIул хьун. Ми яхъанай бур Оран тIисса шагьрулий. Му Алжирнал хъуншагьрулул хъиривсса шагьрур.
Жулва Дагъусттаннай кунма, зунттурдугу, хьхьиригу бия. Авлахъгу бия. Авадансса билаят бур, тайнначIа навт, газ бур. Мяйжан­ссар, чIявусса авадансса агьали бухьурчагу, мискинмигу чан бакъар тийх.
— Каддурдул нитти-бу­ттал ина цукун кьамул бувра, тайнначIа агьали цIакьну диндалул ххуттай бавцIусса бияв?
Мадина: — На Каддурдул нитти-буттал, «бенти, бенти» тIий кьамул бунна. Му «ттул душ» тIиссар. ИчIувациринналгу ххуйну кьамул бунна. Каддурдул ца уссу, кIива ссу бур. Душру ший чулий бацIан бувну, на тия чулий бацIан бувну, ванал нитти-буттал увкуна:
— ХIакьинуния тихунмай ина жун вай жулвами душвавраяр личIи бакъассара, ва жул ужагърайн жул душну бувхссара, ца душ ххи був­ссар жул тIювай.
Диндалул хIакъиравурив, бачIи агьали бур дунъявийсса багьу-бизулул, бачIигу шариаьтрал зумуну къуццу тIутIисса. Дур цаппара цIакьсса кьанунну.
Къатта-къуш паччахIлугъран аманат бансса ихтияр дакъар, ягу мачча-гъаннан. Так оьрчIан. Мукунма ташулул, хъуслил бутIа-бачIу баврил масъалартту так шариаьт­рал кьануннай щаллу байсса бур. Гьаннайсса, кулпат шариаьтрал биялалий бур.
Каддур: – На дин дакIнил хIуж­рардавату най дикIан аьркин­ссар тIутIиминнал тарап дургьумара. Вил дакIнил марцIшиву, инсаншиврий къуццу тIутIаву, ас-ламус бушиву, цIими баву – мури вил дин. Франциянаву, масалдаран, дин дан ччинахь зума ахъайсса, къадагъа дайсса акъар. Бусурмангу бур, цайми диннал агьлугу бур. Амма цучIав щихунчIав ахчилай акъар. Дин цIакьлин дургьуну ихтиярду ссуссукьу дуллалисса кIантту ба­къар. Законну цинявннангу цакуц­сса дур. Мяйжанссар, паччахIлугъ диндалул иширттая архну дур. Дин диндалул ххуллий дур, хIукумат – цила ххуллий.
— Ттигъанну Москавлия увкIсса профессор, Аьра­ли академиялул преподаватель ХIажи Сулайманович ия Африканал билаятирттая бувкIсса бусурман бакъа бакъасса Парижливгума исламрал хъунмасса центр бувну бур, Москавлий цIусса мизит буваву дакъар тIий. Дурив Франциянал хIукуматрал бусурман агьулданух къулагъас, мукун хъунисса исламрал центрду буллай бухьувкун?
Каддур: — Франциянал хIу­куматран царагу диндалул агьулданул ихтиярду ссуссукьу хьуну ччай бакъар. Миннал хъинну хъирив лавсса, куртIсса политика дур, агьалинал оьрму, багьу-бизу, маэшат гьаз буваву мурадрайсса. Диннугу цакуцну ккаклай бур, агьалинавун хIусутшиву къарутланшиврул.
– Мадина щарну буциннин вин Дагъусттанная цичIав бавссияв, кIулссияв?
Каддур: — Ккавкказная бавссия. Чачаннаягу бавссия, тийх дяъвирду хьуну тIий. Мадинащал кIул шайхту, гьай-гьай, Дагъусттаннай хъанахъимунил хъирив агьра. Интернетраву, Европанал СМИ-рдай Дагъусттанная вас-ццах бутлатисса бакъа информация къабикIайва. ДакIнийхтунура тIисса, ххуйсса информациялух луглай икIайссияв, амма спецоперациярдая, терактирдая, боевиктурая бакъа хаварду къабикIайва. Цуксса хIайпнугу, кьурчIимур бия. На Дагъусттаннайн нанини, ичIувацири, архIал зузими, мачча-гъанмигу, ява, мугъаятну икIу тIий, къадагъарду дихьлай бия. Хьумур хьунтIиссар, на ттулва жалиндалухьхьун мунил ватандалийн иян махъ буллуссар куну, аьрххилий увкссияв.
Дагъусттаннал тIурча на хIайран унна: авурсса республика дур, культура авадансса. Ттун, кьатIаллил билаятраясса инсаннан, турист хIисаврай хъинну ххуй дирзунни республика. Так республикалул тIабиаьтралла ххазнардая хайр ласлан лахьхьин бувануккар. Франциянаву, масалдаран, неххал чIарав къун бивчуну, инсантал щинавун бучIайсса, бигьалагайсса кIантту бувну, хайр ласлай буссар. Укун ххаллилсса зунттурду ва хьхьири бунува, республика тIутIайх дичин дансса шартIру дунура, му даражалийн гьаз хьуну чIалай бакъар. Агьали бур зул дакIру хъинсса, хъамал ххирасса. Щиннийн уххарчагу, хъамалу къаувну къаитаакьара. Туризмалуха зун аьркинни. Унгу-унгуну.
Мадина: – Дагъусттаннал тарих Каддурдун ттуннияргума хъинну кIулли. Интернетраву лахьлай, циксса ярусса, дарги, лак буссарив кIулну бия мунан республикалий. МахIаттал хъанан икIайва, чIявусса миллатру цалва мазругу, культурагу, аьдатругу ядурну, бавкьуну, нахIуну яхъанай бушиврий. Утти мукун бушиврий цувагу мукIру хьунни. Ванан жулла культура, аьдатру ххуй дирзунни.
– Мадинай, цайми регионная бувкIсса цинявнна­хьхьун булара на ва суал. Цукунсса дахханашивур­тту хьуну дур республикалий ина лавгния мукьах?
Мадина: — ЧIярусса стройкарду дур, шагьрулувусса стройкардал архитектура, дизайн ххуй хьуну дур. Агьали кьатIаллил билаятирттайн занай, чил билаятирттая ххуймур лахьлай бур.
На республикалия гьаннин так лачакру дичлан бикIайва душру-хъами, утти хиджабирттавусса чIяву хьуну бур. Ттун къакIулли хиджабирттавугу миннуща цукун зун шайссарив, лахъира-лахъисса, гьартасса лаххия дур. Франциянавугу бур чурххал базурду кIучIну янна лархсса душру, ми скромнайну, кIизгу кIучI бувну, чурххал базурдугу кIучI бувну зугу-зий, яхъанай бур. Щялу бахьлай зун къашайхха.
Диндалувун кьувтIуну най бушиву хIисав хьунни. Шариаьтрал ххуллурду цIакь буллай бушиву хIисав хьунни, амма диндалуву данди буккавуртту къаххуйри. Бусурманнал дин цар – ислам. Куннащал ку бавкьуну, нахIуну яхъанарча бакъа, цамур ххуллу исламрал диндалун бакъассар.
— Зу Лаккуйн къабиврув?
Каддур: – Гъумукунгу, ГьунчIу­кьатIувгу бивру. Ттун зунттурдах эшкьи хьунни. ТIабиаьтрал ххуйшиврия ябатIин къахъанай ивкIра. Хъамал ххирашиврулгу хIайран унна. На шава усса куна ияв. Мукун тIааьнсса, нахIусса асарду бияхха дакIниву, ттула ичIува усса кунмасса.
Лавгру Грознайливнгу. Грозный цIубуккан бувну бушиву кIулссия, тукун эмаратсса шагьру хьуну бушиву къакIула. ХIайран унна шагьрулувусса марцIшиврул. Грознайливн бияннинсса трассалий ччюрк, цIинцI бакIрайн къадагьунни.
Мадина: – Машгьурсса тележурналист Ссалам Хавчаев ва мунал кулпат Жанна ттун хьхьичIрасса даврийхчIин кIулссия. Миннал оьвкуну Дарбант шагьрулийнгу лавгссияв. Дарбантуллал мэр Имам Яралиевлущал, премьер-министр Аьбдуссамад ХIамидовлущалгу хьунабавкьуру. Каддурдул миннахь жулва республикалия, агьалиная цIарду дуллалисса ихтилат бунни. Туризм тIутIайх дичин дансса шартIру дусса республика дур тIий ия. Ванан буниялттунгу ххуй дирзунни республика, ччя-ччяни бучIаванну тIий ур Дагъусттаннайн.
– Каддур, Алжирнаву аьраб мазрал лугъатрайри гъалгъа байсса тIий бур Мадина. Му лугъатрай ца-кIива махъ уча.
Каддур: – Маассалама!
Мунил ци тIиссар?
Каддур: — Лякъиннав вин дакьаву, тIиссар.
— Зула лугъатрай учин, Маассалама Шакер Каддур, Маассалама, лакрал куяв. Вингу ххуллухъин баннав, Мадинай!

***
Шакер Каддурдул ва Мадинал жул редакциялул зузалтрал автографру дусса «Илчи» кказит цащала Франциянавун лавсунни. Му кказит ватандалиясса ца яла хъинмур ссайгъатри цала тIювайнсса тIий бия.