Августрал 14-нний, «ТIиртIусса власть» проектран хасну, «Дагестан» РИА-лий журналистътуращал хьунаавкьунни ДР-лул промышленностьрал ва энергетикалул министр Ризван ГъазимахIаммадов. Ганал бувсунни цIанасса ппурттуву республикалул промышленностьравусса ва энергетикалувусса тагьардания, мукунма министерствалул хьхьичIсса масъаларттая. Яла журналистътурал суаллахьхьун дуллунни жавабругу.

ХIасан Аьдилов
Р. ГъазимахIаммадовлул бувсъсса куццуй, республикалий промышленность дуссар, цаппараннал дакъассар, духларгссар тIийнугу. Мяйжанссар 90-ку шиннардил ахирданий респуб­ликалул промышленностьрал дуллай диркIссар валовый региональный продуктрал 30%, цIана тIурча га ккаккия дурчIун дур дурагу 6 процентрайн. Министрнал мукъурттийн бувну, чIявуми заводру, учиннуча, «Сепараторный завод» «Приборостроительный завод» ва «Радиозавод» лакьин багьну бивкIссар, цаппара предприятиярттал давуртту чан хьуна. Амма цаппара хъунисса предприятияртту («Дагдизель», «Авиаагрегат» ва КЭМЗ) зийнма ливчIуна. ЦIана «Дагдизель» заводрал кьутIи чирчуну дур ялунчIил заказ ласаврил хIакъираву. «Авиаагрегатрал» машинар­тту буккан буллантIиссар инвестпроектирдайну. КЭМЗ-рал дуккан даймур тIурча шиная шинайн гьарза хъанай дур.
ЖучIава зий бур радиоэлектроника дуккан дайсса заводру: «Русская электроника», «Электросигнал». Бур химиялул промышленностьрал предприятияртту, масалдаран, ОАО «Мушарака» ва цаймигу.
Р. ГъазимахIаммадовлул бувсунни, мукунма, заводирттай зунсса зузалт лап чансса бушиву, ялунгу ми аьркинну бушиву. Мунияту тIитIин багьлай бур зузалт хIадур бансса колледж.
Министрнал бувсунни завод­ру цIусса техникалул щаллу баврил хIакъиравугу.
Ризван ГъазимахIаммадовлул бувсмунийн бувну, гидроэнергетикалуву хъунмур хъар рутан тIий дур чIивими ГЭС-ирдайн, неххардил дарардавусса багъру щинахьхьун гьан къабулланшиврул. Амма муницIунсса гидроэнергетикалул каширдугу ишла дуллансса пикри бур. Мукунна зузи дан тIий дур бургъил ва мурчал энергетикагу.
Журналистътурал суаллайн бивукун, «Илчилул» вакилнал цIувххунни: «Уттинин бувну бивкIсса, амма 8-10 шинай къазузисса мюрщи ГЭС-ирдал иш ссайн буккантIиссар?» — куну. (Масалдаран, Дюкъуллал ГЭС уттигу къазий бур). Мунин жаваб дуллай, министрнал бувсунни циняв мюрщи ГЭС-ру зунтIишиву чIал къавхьуну.