Августрал 28-нний ДР-лул Президентнал кIанайма Рамазан АьбдуллатIипов хьунаавкьунни ЦIуссалакрал райондалул бакIчинащал. Хьунабакьаврий, мукунма, гьуртту хьунни ДР-лул ХIукуматрал Председательнал хъиривчу Рамазан ЖахIпаров, ДР-лул Президентнал Виваллил политикалул управлениялул хъунама Артур Исрапилов ва цаймигу.
Дагъусттаннал бакIчинал увкусса куццуй, ЦIуссалакрал райондалул лагма гъалгъарду гьарзану бур – ттигу-шилагу щаллу бувну бакъар лак цIусса миналийн бизан баврил масъала.
«Агарда халкь бизан бансса хIукму хьуну бивкIхьурча, миннан цамур миналий къатри дан ккаккан бувну бивкIхьурча, ми давуртту дуван аьркинни цила чIумал. Республика хьхьичIуннай хъит учин даврил пикри буллан кIанай, зу цинявннал, куннал кув хъяврин буллай, гъара буллай бияв. Дуллай дайдирхьумур бакIуйн дуккан дуван аьркинссар, масъала щаллу баврил балжисса хIукму бикIан аьркинссар. Хасъсса план дикIан аьркинссар», — увкунни Р. АьбдуллатIиповлул.
Райондалул бакIчи МахIаммад-хIажи Айдиевлул бувсъсса куццуй, хIакьинусса кьини бувну бур 3054 къатта цIуну бизлазиминнан. Цинявппагу бан аьркинну бур 3717 къатта. Федерал бюджетрава дуркIсса арцух гьашину буллай бур 304 къатта.
Райондалул бакIчинал бувсунни цамургу захIматсса масъалалия: «Москавлия махъсса шиннардий итадакьлай бия так яхьунсса къатри бансса арцу, мунияту социал объектру бан бюхълай бакъая. Райондалий бур цинявппа 4600 оьрчI-бакI. Бувну бур 5 школа, гьарца 200-250 оьрчIансса. Райцентрданий ца школа бур цайми къатри дузал дурну бувсса. Миннуву дуклай ур 1400 оьрчI, ца сменалий — 83% оьрчIал. ЛивчIми шяраваллаву школарду, садикру къабувну бур. Щинал щаллу баврил масъалагу дузрайн бувккун бакъар».
Р. АьбдуллатIиповлул увкусса куццуй, инфраструктурарду бакъасса шяравалу къадикIайссар. Ганал тапшур бунни лак цIусса миналийн бизан баврил хIакъиравусса гьартасса справка хIадур дан, тикку дурсса давурттугу, захIмат хъанахъими масъаларттугу, мукунма социал объектру баврил балжисса план дуван. ДР-лул Экономикалул министерствалун тапшур бунни ялун нанисса шинал бюджетраву ккаккан дан социал объектру ва инженерсса инфраструктура бансса арцу.
«2013-2015 шиннардий аьркинссар къатригу дурну, халкьгу бизан бан», — увкунни республикалул бакIчинал.
ХIадур дурссар ХI. Аьдиловлул
