Августрал 26-нний Дагъусттаннал бакIчи Рамазан АьбдуллатIипов хьунаавкьуссар АьФ-лул ХIукуматрал Председатель Дмитрий Медведевлущал. Хъиривмур кьини МахIачкъалалив зана хьуну махъ га хьунаавкьунни журналистътуращал.
Р. АьбдуллатIиповлул бакIрайва бувсунни Д. Медведев кIул увну ивкIшиву республикалул бакIчинал хIадур дурну диркIсса цинярда программарттащал ва предложениярттащал.
«Ганал дурккунни программар­тту. Дмитрий Медведевлун ххуй бивзунни, жу укунна арцу дула къакуну, республика хьхьичIуннай хъит учин дансса вариант хьхьичIун ласлай бушиву. Ганал хъин чулий ккарккунни Дагъусттан хьхьичIунмай хъит учин бансса корпорация дузал баву», — увкунни Р. АьбдуллатIиповлул.
— ХIукуматрал Председательнан ххуй бивзунни, мукунма, Дагъусттан ттиния тинмай чIярусса федерал программарттавух гьуртту хъана­хъаву. ЦIана жува гьурттуну бухьурча 17-18 программалуву, ялун нанисса шинал гьуртту хъанантIиссару 24 программалуву.
Мунищала архIал на бусав Президентнал майрай бувксса хIукмурдугу биттур буллай бушиву. Аьрасатнал ХIукуматрал Председательнал хасъсса министерстварттан ва ведомстварттан тапшур бунни жунма кумаг бан, — увкунни Р. АьбдуллатIиповлул.
Мукунма Республикалул бакIчинал бувсунни хIукуматрал хъунаманахь «Авиагреат» заводрай куклусса хъус духхай машинартту бансса проект бакIуйн дуккан аьркинну душиву. Ихтилат хьуну бур хьхьичIва билаятрал Президентнащалгу ххалбивгьуну бивкIсса, Росагролизинграл уставной капиталданувун 9 млрд. къуруширттал дичаврия. Аьрасатнал ХIукуматрал Председательнал дакI даркьуну дур машинарттал ва трактордал станцияртту баврил хIакъиравусса Р. АьбдуллатIиповлул пикрилий.
Хьунабакьаврий, мукунма, ххалбивгьуну бур МахIачкъалаллал аэропортрал реконструкция даврил масъалагу.
«Дмитрий Медведев рязи хьуну ур жу личIи дурсса регион хьхьичIунмай хъит учин баврил модель тIайласса ва ххуйсса душиврий. Ганал пикрилий, му модель ишла дуллан аьркинни цайми регионнайгу. Д. Медведевлул бувсунни цалва чулуха кумаг бантIишиву», — буслай ур Рамазан ХIажимурадович.
Яла ДР-лул Президентнал жавабру дуллунни журналистътурал буллусса суаллахьхьун. Суаллу бия, хъунмурчIин, ялун нанисса шинал республикалул бюджетраву хьунтIисса дахханашивурттал хIакъиравусса ва цаймигу.