Бусурманнал тарихраву личIантIисса иш хьунни вай гьантрай Дагъусттаннай. Аьрабнал Эмиратирттая жучIанма республикалийн МухIаммад Идавсил (с.аь.с) реликвиярду ларсун бувкIунни ххюцIала инсан усса делегация. Му делегациялий каялувшиву дуллай ия МухIаммад Идавсил (с.аь.с) реликвиярду ядуллалисса (Хранитель) щайх АхIмад Бин МухIаммад Аль-Хазрати. ХIат-хIисав дакъасса инсантал бувккун бия ларгсса бигьалагай кьини аэропортрайнгу, аэропортрайн нанисса трассалийнгу. АгьалинацIун хъамал хьунабакьин бувккун бия республикалул хIукуматрал вакилталгу: Халкьуннал Мажлисрал председатель Хизри Шихсаидов, ХIукуматрал ва Президентнал Администрациялул хъунама Шагьабас Шахов, ХIукуматрал председатель Аьбдуссамад ХIамидов, мунал хъиривчу Абусупиян Хархаров, Дагъусттаннал муфтий АхIмад-хIажи Аьбдуллаев ва чIявусса аьлимтал.

ПатIимат Рамазанова
Аэропортрай хIурматрай хъамал хьунабавкьуну мукьах МухIаммад Идавсил (с.аь.с.) реликвиярду диян дурна Аьли Аьлиевлул цIанийсса спорткомплексравун. Ряхва гьантлий агьали занай бивкIунни му спорткомплексравун нех дирхьуну.
«Дагъусттаннал президентнал къуллугъ чIумуйну бартбигьлагьисса Рамазан АьбдуллатIиповлул хIарачатрайнур МухIаммад Идавсил (с.аь.с) оьрмулуцIун дархIусса мубараксса экспонатру жула республикалийн дирсса, кьура экспонат ларсун бувкIунни», — увкунни Диндалул идарарттащалсса дахIаврилсса буллалисса комитетрал председатель Мурад Заргишиевлул.
МухIаммад Идавсил (с.аь.с.) реликвиярдай тамаша бан лавгминнавух бия Теологиялул институтрал преподаватель, ЧIаящиял шяраватусса Аьйшат-хIажи ХIажиева. Мунил цилвамур пикри бувсунни:
«МухIаммад Идавсил (с.аь.с.) цIаницIун, оьрмулуцIун дархIусса затру жулла республикалийн дияву – му ххуйсса давур, респуб­ликалий барачат бикIантIиссар. На Грознайливнгу лавгссияв дукIу, Идавсил (с.аь.с.) реликвиярду гихун дуркIсса чIумал. Грознайлив хьуннин жучIара хьун аьркинсса давуя му даву, жулва аьлимталгу чIявусса бур, ми мубараксса затру жучIанна диянсса хIуччарду цаймигу бур. Грознайлив цайми реликвиярду ларсун бувкIуна, жучIанна дуркIми затру личIисса дур. Сайки ххюра ссятрай ялугьлай бивкIра на ми затурдих ябитан яржа бияннин. МухIаммад Идавс (с.аь.с.) ссавруннайн лахъайни (миъражрайн) Мунал хъачIунттай диркIсса хялат дия, Идавсил (с.аь.с.) душнил ПатIиматлул оьрчIал чIарарду дия. Цимурца исвагьийну пюрундалул къуршаву дирхьуну дия. Хъинну чIявусса инсантал бия, мукунсса экспонатру ккаккан бахьтта гьан аьркинссар, бахьтта найгу бия. Экспонатирттай тамаша бувну спорткомплексрава буккайхтурив, ца аьжаивсса паракьатшиву, рахIатшиву дакIнивугу дия.
Ттун кIула ва кьини ци-дунугу ца аьламат загьир хьунтIишиву. Мукун хьугу-хьуна. На му кьини Республикалул Миллатрал библиотекалувун лавгссияв. Аьрабнава бувкIсса хъамаллуран ккаккан азардахъул шинну хьусса Кьурандалул луттирду бия выставка дурну ккаккиялун бивхьуну. Эмаратсса луттирду бия. Гъумучату­ссагу бия Кьурандалул лу, на гъан хьуну бурив куну цIувххуссия. Ми луттирду Элмурдал академиялул филиалдануву бусса бия, гьамин та кьини бия библиотекалувун лавсун ккаккиялун бивхьуну.
МухIаммад Идавсил (с.аь.с.) реликвиярду Дагъусттаннайн дияву республикалул барачат­рансса, хъинмунинсса хьунссар тIисса умудрай бура, агьалинал дакIурдиву иман цIакь хьуннав, рувхIанийсса ххазинардал кьиматгу, кьадругу гьаз хьуннав тIий бура.