Бархъаллал ва Сулевкентуллал тIахIунттив, аьндиял варсив ва ссурхIиял ссуникIурттал кьяпри, оьргърал заргалтурал дурсса арцу-мусил хъаннинсса чIюлушиннарду ва ххаржантру, чIиллу-вай гьарзат ккаккиялун дирхьусса ва машан ласун ччиминнансса «Дагъусттаннал хъаннинсса чIюлушиннардал» цIанилусса выставка тIиртIунни вай гьантрай Республикалул халкьуннал художествалул касмурдал центрданий.

Залму АьбдурахIманова
Выставкалийн дуккан дурну дур цIаларгсса, гьунар бусса заргалтурал дурсса чIюлушиннарду дакъасса, вай касмурду лахьхьин хъунмасса хIарачат буллалисса дахьва байбихьлахьисса Дагъусттаннал художествалул училищалул студентътурал дурсса арцул кьайгу.
КIицI лаганна укунсса журалул выставка дуллалишиву июльданул 26-нний Дагъусттаннал Конституциялул кьинилул хьунийн респуб­ликалул циняв къуллугъчитал миллатирттал лаххи-ликкиялуву бикIан тIалав бувсса ДР-лул Президентнал чIумуйну биттур буллалисса Рамазан АьбдуллатIиповлул тавакъюрайн бувну.
«Арцу-мусил кьай дахлахисса выставка дуллалиссар Дагъус­ттаннал Конституциялул кьинилул хьунийн. Цурда выставка даврил агьаммур мурад халкьуннал касмурду цIудуккан даву, халкьуннаву мукунсса чIюлушиннардал сий лахъ давур. Жула усттартурал ва заргалтурал канил дурмунин лахъсса, лайкьсса кьимат бищун лахьхьин бавур. Хъуннасса даву дуллай буссар миллатирттал лаххи-ликкияртту дурухлай, миннул деталлу ххалдигьлай, цIудуллай. Жун ччай бур дух хьусса, хIакьину хъамадитулул хьусса чIюлушиннардиву ва матахIраву цIусса рухI дишин, миннуву оьрму чантI учин бан», -увкунни ДР-лул халкьуннал художествалул касмурдал Комитетрал председательнал хъиривчу ХIамзат ГъазимахIаммадовлул.
Дагъусттаннай гьунар бу­сса, цIаларгсса заргалтурал кюр­тти хьусса щархъурду чIярусса къадиркIхьурчагу, хъаннил чIюлушиннарду дувайсса ва ми дакьин дан кIулсса усттартал гьарцагу шяраву бивкIссар. Арцу-мусия чIюлушиннарду ва цаймигу затру дан кIулсса гьунар бусса усттартурал щархъурду диркIссар Гоцатуллал, Кубачиял, Гъумучиял, Ругъуджиял, Ссугъращиял шяраваллурду. Вайннал цалла касмулуву ишла дайсса диркIссар гьар кIанайгу ишласса кьалан битаву, филигрань ва цаймигу нукьсанну, амма гьарнал диркIссар ца цанна дакъа къакIулсса техника. Выставкалул сакиншиннарал давриву гьурттушинна дурсса Жяматийсса палаталул вакил МахIаммад Аьбдулхабировлул кIицI лавгунни Дагъусттаннай халкьуннал касмурду хъамадитулул даву жунма кьюкьаласса иш хьунтIишиврун ккалли бан бучIишиву.
-Дагъусттаннал арамтурал хасиятраву мудангу диркIссар цалва хъами-душру рязи бан миннун чIюлушиннарду ласайсса, ми хъихъи битан лаххи-ликкиялун ххирасса яннарду дучIан дувайсса аьдат. На махIаттал-хIайран увну икIайссара жула заргалтурал, ус­ттартурал дурсса затирттал. Жун, Москавлив яхъанахъиминнан, цуксса хIайпнугу, жулла Ватан кьюкьин дуллалисса СМИ-рдал хавардаяр ва цIана хъанахъисса ишираясса, Дагъусттаннай выставкарду, музейрду, магьирлугърал идарартту тIитIлай бур тIисса хаварду бавну ччива. Му бур жул чIаку мурадвагу. На зул хьхьичI ник ришлай ура,хIурмат бусса, ка мусилсса усттартал! Цанчирча зу буну тIий Дагъусттаннал цIа лахъа-хъун данминнавасса хьхьичIва-хьхьичIми. БакIрай чапалсса пас бивхьусса жагьилтал ва ялтту гьухъарив , аварив лархсса дурчIин къашай­сса душру-хъами бакъарча, зуру хIакьсса, дакI марцIсса, захIмат ххирасса дагъусттанлувтал. Ватандалул ялунбучIантIимур зул кIунттихьри бусса,- увкунни ванал.
Шикку махъ лавхъсса Дагъус­ттаннал Художниктурал союзрал председатель КьурбанмахIаммад МахIаммадовлул кIицI лавгунни, жулва гьарнал биялдаралу душиву Дагъусттаннал гьунттиймур кьинилул тагьар .