Вай гьантрай Ккурккуллал жяматран Москавлия ххарисса хавар бавунни. Ккурклиясса Санинал душ Зайдиева (Есаян) Рукьижатлул къуртал бунни И.М. Сеченовлул цIанийсса Москавуллал 1-мур медициналул университетрал стоматологиялул факультет ЯтIул дипломрай. Гьунар бусса цала выпускница мусил медальгу дуллуну кьамул бунни шиккувасса интернатуралувун.
Аьдатравун дагьну дур Дагъусттаннал Республикалул Халкьуннал Творчествалул Къатлул Лакрал райондалул культуралул отделданущал цачIуну лавгзаманнул шаэр, балайчи, мажлисру ярг буллай бивкIсса цинявгу лакран дакIний ливчIсса Ккурккуллал Щазан хас дурсса Лакку балайрдал фестиваль дуваву.
«Забраб. Зарбафт» тIисса уттинин жучIара къархьусса, аьвзалзаманнул яннардал касакирттал, аппликациярттал выставка хьунни МахIачкъалалив цIуну тIивтIусса Этникалул магьирлугърал центрданий. Выставка хас дурну дия Дагъусттаннай бакъа, щаллагу дунияллий цIа ларгсса арцу-мусил усттар, магьирлугърал деятель, уттигъанну аьпалувух бивхьусса Манаба МахIаммадован.
ДачIишинай къалехлайгу диркIун авиаперевозчиктурал рынокрайн дурккун дур RED WINGS авиакомпания. Ларгсса нюжмар кьини июльданул 12-нний МахIачкъалаллал международный аэропортрай хьуну бур ва авиакомпаниялул цалчинмур рейс. Укунсса иш жулла республикалий шаврих ва авиабилетирттал багьри лагь хьуншиврийн, самолетру леххаврил тагьар къулай хьуншиврийн умуд бивхьуну ссавур дакъа ялугьлай бивкIссар ца пассажиртал бакъассагу, цурда аэропортрал каялувшиннагу.
Дунияллул тарихраву яла оьхIалмур, захIматмур дяъвину хьусса Буттал КIанттул цIанийсса Хъунмасса дяъвилий талай бивкIминная буслан, аьпалул хьуми дакIнийн бичлан бикIай, хъунмурчIин, Ххувшаврил кьини ва дяъви цуппа байбивхьусса июньдалул 22-мур кьини.
Утти дурусну кIулну бур ахир замана бизансса кьинигу, ссятгу. Га дур 2029 шин, нюжмар кьини, апрельданул 13, 4 ссят ва 36 минутI. 65 азарва атомрал бомбалул энергия цаву бусса, 50 млн. тонналул кIушиву дусса, 320 метралул диаметралийсса астероид Апофис зурул орбитагу лавхъун, АьрщарачIан кIункIу хьунтIиссар ссятрай 45 азарда километралул бущилий.
ХIажинал арс Кьадиров Аьбдул Оьрмулул 73 шинаву, мадара хIаллай къашавайгу хьуну, дунияллия лавгунни чIявусса захIмат бувсса, дугърисса зунтталчу ГьунчIукьатIатусса Кьадиров Аьбдул ХIажинал арс. Аьбдул увну ур 1940 шинал ХIажинал ва ХIапсатлул кулпатраву. Аьбдуллун цала буттал лажин ккарккун дакъар. Кьадиров ХIажи 1940 шинал Краснодардая военкоматрал армиялийн увцуну, 1941 шинал дяъвилий ивкIуну ур.
