Январьданул 15-нний МахIачкъалалив ДР-лул Хъунмур банкирал председатель Сиражуттин Илиясовлул бунни «Экспресс» банкирал хIакъиравусса пресс-конференция.
Журналистътуращал ихтилат буллай, С. Илиясовлул бувсунни, «Экспресс» банкирал давриву диялдакъашивуртту хIасул хъанай диркIшиву дукIу ноябрьданий.
— «Экспресс» банкирал вкладчиктурал ва клиентътурал мурадру буруччаврин хасну, Хъунмур банкирал закондалийнусса тIалавшиннах та банкирал къулагъас дуллай бакъая. ХIакьину иш-тагьар оьнийн дагьну дур, — увкунни ганал.
ДР-лул Хъунмур банкирал председательнал мукъурттийн бувну, банкирай хьусса тагьарданул буруккин бутлай бур га банкирал клиентътуравун. Миннавух бур электрондалул картардайхчил харжру ласласисса учительтал, студентътал, министерстварттал ва ведомстварттал зузалт ва цаймигу.
МуницIунма С. Илиясовлул бувчIин бунни:
— Банкирай арцу дирхьуну диркIминнал мурадру мюхчанну буручлай буссар паччахIлугърал. Страховыйсса иш хьурча банкиравусса арцу гай дирхьуминнахьхьун зана дантIиссар щаллуну. Ми цукун ва та зана дантIиссарив, бусанну чансса махъсса чIумуву кказитирттайхчил ва телевидениялийхчил.
Щаллуну дурурччуну дуссар инсантурал дирхьусса 700 азардаксса къурушру. Агарда ядан дирхьусса арцу (вклады) ва текущий счетру ккаккан дурсса лимитраяр ххишаласса хъанарча, лирчIми арцу (700 азаруннияр ххишалами) лахъантIиссар дуллусса кредитру зана дурну махъ ва банкирал активру ишакаш дурну махъ, — бувчIин бунни С. Илиясовлул.
Ганалва бувсмунийн бувну, хIакьинусса кьинигу «Экспресс» банкирал лицензия махъуннай тIалав дурну дакъар, га организация зузимунин ккаллиссар. Щялусса хавардайн ва тIардайн вих хъанан къааьркинссар. Агарда банк лицензиялуцIа хьурча, банкирай каялувшиву дуллантIиссар чIумуйсса администрация. Яла иширавух хIала буххантIиссар Банкирдал страхованиялул агентство, ганил 14 гьантлул дянив га банкирал хIалкьазия кIул дантIиссар, мукунма ккаккан бантIиссар дирхьуну диркIсса арцурду махъуннай зана дансса цамур банк.
Ккаккан дурсса чIун ларгукун агентствалул зана дуллантIиссар банкирай дирхьуну диркIсса арцурду.
