Январьданул 15-нний Дагъусттаннал Журналистътурал союзраву хьунни журналистътурал мюхчаншиву дуруччаврин хасъсса пресс-конференция.

Тикку гьуртту хьунни ДР-лул Президентнал Информациялул политикалул ва прессалул къуллугърал управлениялул хъунама Зубайру Зубайруев, ДР-лул информациялул политикалул ва массовый коммуникациярттал министр Нариман ХIажиев, ДР-лул Журналистътурал союзрал председатель Аьли Камалов, Аьрасатнал Журналистътурал союзрал секретарьтал Надежда Ажгихина ва Александр Копейка, СМИ-рдал ихтиярду дуруччаврил центрданул директор Галина Аракова, «Кавказский узел» интернет-порталданул хъунама редактор Григорий Шведов ва цаймигу.
Пресс-конференция тIитIлай, Надежда Ажгихинал бувсунни бакIрайва пландалий бивкIшиву журналистътурал ихтиярду дуруччаврил, гай юридийну буруччаврил масъалартту ххал бигьаву, амма вай гьантрай «Новое дело» кказитрал журналист АхIмаднаби АхIмаднабиевлул оьрмулийн оьсса кьаст лахIаврийн бувну, даврил план чан-кьансса даххана хьушиву.
Яла махъ лавхъунни Григорий Шведовлул. «12 шинал мутталий жул порталданул тачIав къарирщуссар багьлухсса материаллу, щиячIав къаларсъссар арцугу. Гьарца бивщусса «Кавказский узелданул» информациялул жаваб дулайссар редакциялул ва на нара. Вай махъру на баян буллай ура жул журналист А. АхIмаднабиевлул оьрмулийн оьсса кьаст лархIуминнан. Му иширал хъирив лаллай буссар ихтиярду дуруччай органну. Ва преступление дурми паракьатну къабитанну, чIярусса шинну гьарчагу, къалявкъуну къабитанну оьрмулийн кьаст лархIумигу, заказчикталгу», — увкунни Г. Шведовлул.
Ихтилатру бунни мукунма Н. Ажгихиналгу, Г. Араповалгу, А. Копейкалгу. ДР-лул Информациялул политикалул ва массовый коммуникациярттал министр Нариман ХIажиевлул бувсмунийн бувну, АхIмаднаби АхIмаднабиевлул оьрмулийн оьсса кьаст лахIаврия кIулну бур ДР-лул Президентнан, масъалалух къулагъас дуллай бур республикалул бакIчинал администрациялул.
Пресс-конференциялий ихтилат бунни ДР-лул Президентнал информациялул политикалул ва прессалул къуллугърал управлениялул хъунама Зубайру Зубайруевлулгу.