Декабрьданул 10-нний «Анжи» ччалли дурккунни Санкт-Петербургуллал «Зенитращал» 1:1 счетрайну ва мунийну къуртал хьунни Аьрасатнал чемпионатрал 1-мур бутIа. ЦIана МахIачкъалаллал «Анжи» дур турнирданул таблицалул 2-мур ххуттай. 2012 шинал премьер-лигалул махъва-махъмур тIуркIу хьуна Санкт- Петербургуллал «Петровский» стадиондалий. Голлу бавкьуна Жоао Карлослул ва Константин Зыряновлул.
Утти ва «Зенитрал» кIилчинсса тIуркIур тамашачитал бакъа хьусса. «Зенитрал» футболчитал Кришито ва Лукович майданнив къабувккуна, цIунцIияртту хьуну. Роман Широковгу гьуртту къавхьуна, танмихIрайн кIункIу увну. Ганан кIанай ия К. Зырянов. «Анжилувугу» хьуна чан-кьансса дахханашивуртту. Ца нюжмардул хьхьичI кIира хъахъими карточкартту ларсун, Шатов укьан увну ия тIуркIулува. Лазаретраву бигьалаглай ливчIуна Ф. Смолов ва Э. Алмейда.
«Зенитрал» футболчитал най буна гужну буклан бивкIуна. Амма тIуркIулуву счет тIитIин бювхъуна «Анжилул» тIуркIутIалаща. Юрий Жирковлул ххуйну ттуп тIайла бувккуна Жоао КарлослучIан, ганалгу паракьатну бивщуну гьан бувна къапулул мурцIнийн. ХIатта муттаэтурал шама защитникнаща цичIав бан къавхьуна га тагьардануву. Цалчинмур таймрал ахирданийннин счет даххана къархьуна.
ТIуркIулул кIилчинмур бутIуй гужну дуклай дия кIирагу команда. 62-мур минутIраву Лосина Траурел гужну бивщуну гьан бувсса ттуп къапулул ттурцIайн щуна. Муттаэтал контратакалийн кIункIу хьуна. Ца шанна минутIрай Габуловлун багьуна цалва къапу ххассал буллан тайннал гьужумирттая. КIилчинмур гьужумраву К. Зыряновлуща бювхъуна жулла командалул къапулувун гол бакьин. Муния махъгу Халклул ттуп тIайла бувккуна ДанничIан, ванал гужну бивщусса ттуп къапулул ялтту левххун лавгуна.
Ялун ххи дурсса чIумуву муттаэтурал командалува Данни укьан увна, судиянал ятIулмур карточка ккаккан дурну, судиянахь сситтуй махъ учаву сававну. Му тагьардануву бунагу, муттаэтураща бювхъуна счет гара куццуй личIан дан. Счет дия тIуркIулул ахирданий 1:1.
Премьер лигалул хъиривмур тIуркIу хьунтIиссар 2013 шинал мартрай.
«Зенит»: Малафеев, Янбаев, Губочан, Ломбертс, Анюков, Алвеш, (Быстров), Денисов, Витсель, Зырянов (Семак), Данни, Халк.
«Анжи»: Габулов, Логашов, ТIагьирбеков, Самба, Ж. Карлос, Буссуфа, Жирков, АхIмадов, Диарра, Это О, Траоре (Карсела-Гонсалес).
