Ноябрьданул 16-нний Дагъусттаннал БакIчи Сергей Меликовлул дурунни Дагъусттаннал цаппара кIанттурдай чани ва щин дакъа личIаврил хIакъиравусса анавархъиндарайсса батIаву. БатIаврил савав хьунни МахIачкъалалив ва цаппара муниципалитетирттай халкь чани бакъа личIаву.
Гьавалул тагьар оькки хьуну, Дагъусттаннай чани бакъа ливчIун бия 100 азаруннияр ххишаласса инсантал. Мукунсса тагьар хьувкун, Дагъусттаннал БакIчинал тапшур бунни МахIачкъалалив дузал буван оператив штаб, мивун цачIун бунни МЧС-рал вакилтал ва шагьрулул циняв мурадлувсса къуллугъру.
Му штабрал каялувшиву дуллан тапшур бунни ДР-лул вице-премьер, энергетикалул министр Владимир Лемешкойн.
Сергей Меликовлул бувсунни авариялул тагьардануцIунсса циняв масъалартту дузрайн буккан буван аьркиншиву оператив штабрал ччясса мутталий.
БатIаврий мукунма ххал бивгьунни ЦIуссалакрал райондалий токрал подстанция зузи баврил масъалагу. Меликовлул тапшур бунни ччясса мутталий электроэнергиялул объект зузи буван, аьркин хьурча, республикалул луртандарал фондрал арцугу ишла дурну.
«Россети Северный Кавказ»- «Дагэнерго» филиалданул тIимунийн бувну, гужсса гъарал лачIаврийну ва марч сукку шаврийну МахIачкъалалив ва мунил зума-къирагърай, мукунма цаппара районнай чани левщун бур. ГацIана пишакартал зун бивкIун бур энергиялул объектирдаха.
