Ноябрьданул 12-нний Дагъусттаннал БакIчи Сергей Меликов хьунаавкьунни федерал, республикалул ва муниципал СМИ-лул вакилтуращал.
Хьунабакьаврил дайдихьулийсса цала ихтилатраву Сергей Меликовлул чIурчIав дурунни цала ппурттуй бартбигьлан нанисса мурадирттай, цала ласлан нанисса цалчинсса шаттирдай.
– Жунма аьркинссар 2025-ку шинайн бияннинсса иширттал, республика лябукку буну хьхьичIуннай нани даврил язи-язими ххуллурду ххал бигьин сакин дан ва цIакь дуван муницIунсса концепция.
Цалчин, ва чIумул мутта тIайла бацIлацIиссар жула паччахIлугърал федерал программарттайнгу, кIилчин, ва хъанахъиссар дан-дитанмунил хIисав-сан дуван, лаласун хъинну хIалусса, итталу битан шайсса муттану, – кунни ванал.
Гьай-гьай, ца яла къювусса ва агьамсса масъалану хъанахъисса коронавирусрал сакин хьун дурсса тагьарданул ялувгу бунни буруккин хIаласса ихтилат Меликовлул. «Тагьар бигьасса дакъанугу, иш контрольданулу бур», – кунни ванал.
Сергей Меликовлул тIимунийну, укунсса хьунабакьавуртту дуллан пикри бур шанма зуруй цал, аьркин хьурча, ирглий дакъагу.
Республикалул каялувчинал бувсунни журналистътурал ккуран дузал дувансса пикри бушиву: «Жура дузал дуванну ккуран, микку ччиманаща бюхъантIиссар ласун аккредитация, миву дикIантIиссар цинявннан цасса кьяйдарду – ттунгу, властьрал структурардал вакилтурангу, зунгу, СМИ-лул вакилтал хIисаврай.
Ми кьяйдардал хьхьичIмур ххуттай дикIан аьркинссар цалла даву хъинну кIулну душаву, журналистнал этика, къирият. На ттула чулуха махъ буллай ура зухьхьун, цинявннан чIалай, аьчухну зун», – кунни ванал.
