Коронавирусрал пандемиялул тагьарданий зузиссаксса хIаллай шацI хьуну бия учительталгу, оьрчIал нину-ппугу. ОьрчIал кIулшиву дулаврил даража ялавай багьаврий чIурчIав дуллай бия оьрчIал нину-ппу. Му тагьардануцIунгу, хIакьинусса кьинилуцIунгу бавхIусса хьунни Лакрал райондалул КIулшиву дулаврил управлениялул каялувчи Явсупи ХIамзаевлул ва жул дянивсса ихтилат.

---

– Явсупи МахIаммадович, цукун бувкри райондалул кIулшиву дулаврил идарартту пандемиялул тагьарданува? Цукун ларгри цIусса дуккаврил шинал цалчинсса четверть?
– 2019-2020 дуккаврил шин чувчIаврагу бигьасса къархьунни. Дистанцион журалий кIулшиву дуллангу, ласлангу, архсса зунттал кIанттурдайсса районная гъалгъа тIуннин, хъуни шагьрурдайсса школарттугума хIадурну ба­къая. Шяраваллил кIанттай тIурча, лапва жапану бия. Дистанцион журалий дарс лахьлансса шартIру дакъая, цаппарасса шяраваллаву интернет цил багьайкун зийгу дакъая.

Жу дурсса анализрайн бувну, бувагу 20 процент оьрчIал бия дистанцион журалий ккалансса шартIирдал дузалну. Райондалул бакIчи Юсуп МахIаммадовлул маслихIатрайн бувну, Щардал, Гъумучиял, Ккурккуллал, КIундиннал школарттайсса компьютерду ва ноутбукру буллу­ссар 9-мур ва 11-мур классир­ттал дуклаки оьрчIахьхьун шаппа-шаппай, цанчирча ОГЭ ва ЕГЭ дулун багьлагьисса оьрчIру дарсирдал махъун багьансса чара бакъа тIий.

ХIадурну бакъая учительталгу, миннан багьлай бия личIи-личIисса площадкарттай зун. Хъунмасса бияла му ишираву бия нитти-буттахъахьгу, оьрчIру цила чIумал дарсирдай щябитан, ялув бацIан. Яла захIматну бия мюрщими классирттал оьрчIащал зун. Барчаллагь хьуннав учительтуран, миннал хIарачатрацIух ду­ккаврил процесс сантирайн бутан бювхъуна.

Аьмну дуккаврил шинал хIа­силлу оьккисса къархьунни. КIулшиву дулаврил министерствалул амру бувну бия шинал лажиндарай кIива къалавсъсса 9-11 классру къуртал бувсса оьрчIан аттестатру булун, жулла райондалий цуя-ца къаливчIунни аттестат къалавсъсса. Ккаккан бувну бия ОГЭ-луя цинявппа мурахас бан, ЕГЭ тIурча, дулун цала хушрай, яни лавайсса дуккаврил идарарттавун дуклан буххан ччиминнал.

Школа къуртал був­сса 38 оьрчIава 32-ннал дуллунни ЕГЭ. Дурсса анализрайн бувну, ларгсса шинах бурувгун, цаппара дарсирдал хIасиллу ххуйсса хьунни. Ххари хьунсса хIасиллу хьунни оьрус мазрал экзамендалул – дянивсса балл 56-60. Ларгсса шинал буссия 53,2. ТIайлассар, мукьа оьрчIаща къабювхъунни ккаккан бувсса 36 балл ласун. 32 оьрчIава 8 лавсунни 80-нния ливчу­сса баллу. Ххуйсса хIасиллу кка­ккан дунни КIундиннал школалул оьрчIал – дянивсса балл хьунни 77. Шамуннал ЕГЭ дуллунни 85 балланун. Ккурккуллал школалия кIия оьрчIал лавсунни мукунма 80-нния ливчусса баллу.

ХьхьичIунсса хIасиллу дия Щардал ва ГьунчIукьатIрал школар­ттал оьрчIалгу. Ххуйсса хIасиллу хьунни профилсса математикалул экзамендалул – дянивсса балл 45,4, ларгсса шинал буссия 39 балл. Лайкьсса хIасиллу хьунни химиялул экзамендалул – 47,7, ларгсса шинал буссия 38,7. Биологиялул хьунни ххуйсса хIасиллу. Лащинсса хIасиллу дия обществознаниялул – 39,3 ва тарихрал экзамендалул – 36,1. Махъсса шиннардий тарихрал ва обществознаниялул хIасиллу ххуй­сса дакъар.

ЕГЭ дулун бювхъусса 28 оьрчI, цуя-ца кьатIув къалив­чIун, лавайсса ва дянивсса дуккаврил идарарттайн дуклан бувххунни. Ххюя оьрчIал школа къуртал бунни мусил медальданущал – шама Гъумучиял, кIия КIундиннал.

Медаллу ларсминнава Гъумучиял школа къуртал бувсса ХIасанов Намрут, ЕГЭ-лул баллах бурувгун, кьамул унни Санкт-Петербургливсса Аьрали медициналул институтравун.
ЦIусса дуккаврил шин дайдишарду Роспотребнадзорданул тIалавшиннардацIун бавкьуну. Эпидемиологиялул тагьар ттигу цалий дацIан дурар, школарттай кьянкьасса ялув бацIаву дур. Дарсру цила кьаралданий дихьларчагу, чIявусса инсантал бавтIсса мероприятияртту дуллансса ихтияр ттигу дулун дурар. Коронавирусрал инфекция ппив шаврия мюхчан хьунсса гьарца чаранну ишла буллай буру.

Цалчинмур четверть аварасса иш къавхьуну къуртал дан бювхъунни. ОьрчIру каникуллая букканнингу гьарца школарттай дезинфекциялул давуртту дурссар.
Сентябрь зуруй хъинну чIя­вусса учительтал къашай хьуна. ЦIанакул бакъар къашавайсса я учительтал, я дуклаки оьрчIру.

– Шяраваллил кIан­ттурдай шиная шинайн яларай дагьлай дур дуклаки оьрчIал аьдад. Лакьлай бур оьрчIру чансса школартту. Ларгсса шинах бурувгун, тагьар цуксса даххана хьур?
– Ларгсса шиная гьашинунин райондалий цавагу школа лакьин къабагьунни. ОьрчIал аьдад хIисав дарча, ларгсса шиналнияр ххи хьунни, уссия 769, хIакьину ур 782 оьрчI. Ми ххи хьунни Гъумук, Щарав, Кьубав, ШавкIрав.

Школарттай оьрчIру чан къахьунсса хIарачат райондалул каялувчитуралгу буллай бур. Жагьилсса кулпатру давурттал дузал буллай бур, школарттай шартIру къулай дуллай бур.
Райондалул бакIчи Юсуп МахIаммадов мудангу итталу бувгьуну уссар кIулшиву дулаврил масъалартту. Цува райондалул бакIчину зун учIайхтува, ва айивхьуна Гъумук цIусса школа буллай. ТIайлассар, му буллай лахъи лавгунни. Гьашину бувну къуртал бувссар. Ялугьлай буру матахI дучIаннин, 22 млн къурушир­ттансса матахI дучIан аьркинссар, шагьрурдайсса школарттай дусса шартIру дузалну дикIантIиссар. Спортзал ва ттуплий буккайсса майдан буссар, пищеблок ттизаманнул тIалавшиннардацIун бавкьуссар.

На дахьа райондалул КIулшиву дулаврил управлениялул каялувчину зун увкIсса чIумал райондалий 85 процент школарттал бия лекьавайсса тагьарданий. ХIакьину ацIния ряхвагу школа буссар капиталнайну бакьин бувну, я кIанттул бюджетрах, ягу личIи-личIисса республикалул ва федерал программарттавух гьур­тту хьуну.
Ми проектирдавух гьуртту хьунгу райондалул бакIчи хъинну ялув авцIуну ур, школалул директортурахь маслихIатру буллай ур, меценатътал цува ляхълай ур.

ЦIанакул райондалий федерал программалул лагрулий капитальнайну бакьин буллай буссар ряхва школа: Щардал, Карашрал, Уриннал, Хъурхърал, Кумиял ва Хъунайннал. Вай школартту ливчIун бия ттинин отопление дакъа, хъуручIрай пачру лахълахъи­сса даражалий. ДуцинтIиссар дизельданул ччуччиялий зунсса отопление, щин. БантIиссар пищеблокру.

Къулайшиннарду хьуссар школалийн гьаннинсса кIулшиву дулаврил аралувугу. Мукьра шинал хьхьичI бувссар 60 оьрчIансса детсад, шанна шиная тинмайсса оьрчIру заназиссар кIиккун. Гьашину Гъумук буллай байбишинтIиссар, типовойсса,120 оьрчIансса цIусса детсад. 1950-ку шиннардийва халкьуннал каширдацIух був­сса детсадрал къатри хIакьинусса тIалавшиннардацIун бакьлай бакъар.

– Билаятрал БакIчи агьам­сса ххуттай бихьлай ур школарттай гъилисса дукра дузал даврил масъала. Цукунсса дур райондалул школарттай мунил дузалшинна?
– Мюрщими классирттал дуклаки оьрчIру гъилисса дукралул цил багьайкун дузал бансса шартIру хIакьину зунттал школарттай дакъар. Уттинин гъилисса дукра дуллай буссия республикалул арцух – 15 къуруш ца оьрчIан ккаккан дурну. Гьашину Аьрасатнал Президент Владимир Путиннул федерал бюджетрава арцу ххи дурунни гъили­сса дукралун – 61 къуруш бакIран. Мунищала архIал ххи дунни тIалавшиннардугу – бикIан багьлай бур хъунисса школарттай кунмасса пищеблокру.

– Махъсса шиннардий райондалул цаппарасса школарттай биялну ба­къая кьатIаллил билаятирттал мазурдил учительтал. ХIакьину ци тагьар дур?
– Мяйжаннугу, арулла-мяйра шин хьуссия кьатIаллил мазурдил дарсирдал учительтал биял къахъанай. Му масъала шагьрулул школарттайгума бия. КьатIаллил билаятирттал маз кIулсса инсан хIакьину школалийн най акъар, мунал ччатI лякъинсса ххуллурду илкинни.

Гьашину «Земский учитель» программалул кумаграйхчил райондалийн увкIунни шама учитель – кIия Хъурхъив, ца Уриннал школалийн (ялавайми классирттал учительница). Ва программалувух багьлай бур жунма хIала буххан, биял къа­хъанахъисса учительтал тIалав буллан. Райондалий аьркин багьлан най бур математикалул ва биологиялул учительтал. Жу, цIанава хъирив буклай, луглай буру му программалувух гьуртту хьунсса учительтурах. ДакIний буссару январь зурул 1-нния тийнмай вакансияртту ккаккан дан.

– Луттирдал щаллу хьу­ссарив школартту?
– Школартту 90 процентрал дузалну буссар луттирдал. Буру­ккин бур лакку мазрал луттирдал, бувагу бакъар 3-4-ми классир­ттансса луттирду.

– Эпидемиологиялул тагьаргу хIисавну, ци даражалий дур ххисса кIулшиву дулаврил даву?
– Ялун ххисса кIулшиву дулаврил идарартту зунсса ихтияр дакъар ттигу.
Гъумучиял оьрчIал магьирлугърал школа ва чIава жагьилтурал спортшколартту зий буссар дистанцион журалий.
– Барчаллагь, Явсупи МахIаммадович! ТIай­лабацIусса хьуннав дуккаврил шин!

Ихтилат бувссар
З.Тахакьаевал