Билаятрал Президент Владимир Путиннул бувсса хIукмулийн бувну классрал каялувшиву дуллалисса гьарцагу педагогнан дан ккаккан дурсса 5 азарда къурушрал лагрулийсса арцу дирунни жулла республикалийсса сайки 24 азара учительначIан.
Бадрижамал Аьлиева
Билаятрал БакIчинал увкусса куццуй, вай арцу цукунчIавсса цайми «надбавкарттайн» ва «доплатарттайн» хъар хъанан къааьркинссар, бигар бивхьуссар муниннин диркIсса цинярдагу ялунсса арцурду гихуннайгу дуллан. Гьарцагу классрал каялувчинан дуллалисса 5 азарда къуруш итадакьлакьиссар федерал бюджетрава, мунияту региондалул буккан буллалимур харжлугърайн вайннул цукунчIавсса асар биян буван къааьркинссар.
Учитель цумур классрал каялувчину унугу, му классраву цими оьрчI унугу, гьарцагу каялувчинан дагьлагьиссар вай арцу. Агарда, пишакартал биял къахъанай, ца учительнал цал архIал кIива классрай каялувшиву дуллай ухьурча, мунан гьарца зуруй 10 азарда къуруш дагьлагьиссар. Классрал каялувшиврухлусса арцу агьаммур харжирал арцущал итадакьлакьиссар, мунийн бувну налограл 13 процент миннуягу бугьлагьиссар.
Вай арцу учительтуран наниссар каникуллал чIумалгу, карантин ягу цамур ци-бунугу багьана хьуну, даву дарцIусса чIумалгу.
Агарда, вай арцу къадирну, аьрзирай ягу цамур ци-бунугу суал булун аьркин хъанай бухьурча, оьвчин бюхъантIиссар ДР-лул КIулшиву дулаврил ва элмулул министерствалул «Горячая линиялийн»:
8-988-695-65-10; 8-938-798-00-38.
