ЦIусса кIанттай – цIусса гъирарай

Каспийскаллал Аьрасатнал халкьуннал аслийсса культуралул центр бивзунни цIусса къатравун


Махъсса шиннардий, халкьуннал культуралухсса къулагъас ларай дуллай, жулла республикалул муниципалитетирттай тIивтIунни Аьрасатнал халкьуннал аслийсса культуралул центрду. Мукун, 2014-ку шинал республикалул каялувшиндарал сипталийну Каспийскалийгу тIивтIуссар Аьрасатнал халкьуннал аслийсса культуралул центр. Уттигъанну Центр бивзунни цIусса къатравун.

Каспийскаллал Аьрасатнал халкьуннал аслийсса культуралул центрданул директор Башикар Гадаева ва цIа дурксса коллекционер, «Вернисаж» галереялул заллу Камалуттин Кьурбанов

ЦIа дурксса музыкантътурал династиялул вакилтал: хъунама Сяид Дибиров ва чIивима Сяид Дибиров

Бадрижамал Аьлиева
Уттинин му буссия «Дагдизель» заводрал Культуралул къатлуву. ТIивтIуния шинмай, ряхрагу шинал мутталий, ши­кку хьуссар цикссагу фестиваллу, конкурсру, выставкартту ва цаймигу шадлугъру. Ряхрагу шинал мутталий Башикар Гадаевал каялувшиндарай шикку, сакингу хьуну, цIакь хьуну бур цалла даву ххирасса, ххуйну кIулсса коллектив.

ЦIана тIурча, му Центр сакин бувну буссар шагьрулул цIуну хIасул хьусса микрорайоннава­сса цанний, Лениннул цIанийсса кучалий. Хъунмасса захIмат бивхьуссар Центрданул зузалтрал, жулва лакку душваврал – директор Башикар Гадаевал ва мунил хъиривчу Гюльнара Акаевал бачIвасса къатраву «да­гъусттаннал халкьуннал рухI дихьлай», мивун увхнан най буна, бу­къавсунма, дагъус­ттаннал миллатирттал культуралия, багьу-бизулия кIул хьунну ми чIюлу буллай. Дуван аьркинсса циняв давуртту щаллу хьуну махъ Центрданул цIусса къатраву хьуссар шадлугърай­сса батIаву.

Ряхрагу шинал мутталий Центрданул ва шагьрулул личIи-личIисса идарарттал дянив хIасул хьуну дур дусшиврийсса дахIавуртту.
Башикар Гадаева барчаллагьрай бур чIарав бацIаву дуллалисса шагьрулул администрациялийн, С. Агъабабовлул цIанийсса музыкалул школалул, ОьрчIал творчествалул къатлул, Интернационал дусшиврул клубрал, ОьрчIру итххяххан бавриха зузисса 23-мур центрданул ва цаймигу идарарттал каялувшиндарайн.

Хъунмасса барчаллагьрай бур цала чIарав бавцIусса лакрал вакилтурайн цIусса къатравун бизан хIадур хъанахъийни миву аьркинсса чIамурдугу, цайми-цайми давурттугу дурсса, Центрданун багьлул ххирасса бахшишгу дур­сса, «Вернисаж» тIисса цIанилусса художествалул галереялул заллу, Камалу­ттин Кьурбановлуйн; музыкалул чулухасса чIарав ацIаву дурсса, Дибировхъал агьулданиясса Сяидлуйн.

Читайте также: