Октябрьданул 5-нний учительтурал кьамул бай пишакаршиврул байран барча дуллалисса дакIнихтунусса махъру.
Пишардаву ца яла бусравминнувасса учительнал даврий чIярусса шиннардий зий бивкIсса, уттигъанну, чIумул дурсса дахханашивурттайн бувну, му пиша кьабитан багьсса ХIажиева Биби МахIаммадлул душгу барча бунни щаллагу дунияллийх кIама бивщусса чIявусса оьрчIал. Педагогнал даврий зий ванил хьуну дур 63 шин.
Бадрижамал Аьлиева
Бувну бур Биби Ахъушиял райондалийсса Уручуллал шяраву 1934 шинал. Буттал шяраву школагу къуртал бувну, дуклан бувххун бур Буйнакскаллал педучилищалувун. Мугу къуртал бувну, цаппарасса хIаллай зий бивкIун бур Хъюллал школалий. Кулпатрал хьуну, цилва оьрму бавхIуну бур Уручуллал шяравасса ХIажиев Даниял Кьурбаннул арснащал. Махъ бивзун Каспийскалийн, зун бивкIун бур шагьрулул 8-мур школалий байбихьулул классирттахь дарсру дихьлай. Микку Биби МахIаммадовнал дурну дур 61 шин, му школа бувну, тIивтIуния шинмай, ва шинал 1-мур сентябрьданийн бияннин зий. Ва бур Дагъусттан Республикалул лайкь хьусса учитель.
Бибил лас, аьпа биву, ХIажиев Данияллулгу Каспийскаллал шагьрулул 1-мур школалий математикалул дарсру дихьлай 50 шин дурну дур. Вайннал дянив хьуну бур шанма ххаллилсса душ, миннувату кIиннил язи бувгьуну бур нитти-буттал ххуллу: хъунмур душ Аьлиева Мариям учительну зий бур Сергокъалалий, кIилчинмур душ Ибрагьимова ПатIимат бур оьрчIал багърал хъунмур; чIанма-чIивимур – МахIаммадова Зумрат «Дагъусттан» ГТРК-лий продюсерну зий бур.
Биби МахIаммадовна цикссагу оьрчIан кIилчинсса нинуну бивкIссар, цалчинсса учительница – му кIилчинсса нинур. Цалчинсса учительнайн тIайланма хъар шай оьрчIал гихуннайсса дуккаврихсса гъирагу, гихунмайсса оьрмулухсса ябитавугу. Биби МахIаммадовнан цилла дарс дирхьусса гьарцагу оьрчI дакIний ур, му чассарив, щиллив. Ванил кIулшиву ва тарбия дуллусса оьрчIавасса чIявуминнал цалва цалчинсса учительницащалсса дахIаву дуцан къаритай, цивппа чув бунугу. Ва бакъарив учительналмур бахтти-талихI.
Барча вил пишакаршиврул байран, Биби МахIаммадовнай. Битаннав ина оьрмулия щалихханнин, вила душваврал ва инава оьрмулул ххуллурдайн буккан бувсса тарбиялувтурал барчаллагьрал ва хIурматрал махъругу кьамул буллайнма!
