«Аьрасатнал чIурду»

ДР-лул Культуралул министерствалул, Республикалул Халкьуннал творчествалул къатлул, Культуралул ва тарихрал хъиривлаявурттал ва кIулшиврул «Тарих ХХI век» тIисса цIанилусса центрданул хIадур дурну,

муниципал сакиншиннардал гьурттушиврийну, июльданул 25-нний, Дагъусттан Республикалул Конституциялул кьини, МахIачкъалалив, Елена Исинбаевал цIанийсса стадиондалий, хьунтIиссар «Аьрасатнал чIурду» тIисса фестивальданул гала-концерт.


Бадрижамал Аьлиева
Фестиваль дуллалиссар «Культура» тIисса Национал проектрал лагрулий ва Бюхттулсса Ххувшаврил 75 шинан хасну.
Вай махъсса зурдардийсса циняв шадлугъру кунна, фестивальданул хьхьичIми ятIапIру хьуссар манзилданий.

Утти, билаятрайсса, республикалийсса эпидемиологиялул тагьар цахъи къулай хьувкун, фестивальданул гала-концерт хьунтIиссар жува аьдатсса журалий.

Гала-концертран ва кьинигу нахIакь дакъар язи дургьусса – чIяву миллатру бусса Аьрасатнал регионнал дянив Дагъусттан буну тIий ца яла чIявуми миллатру нахIуну, бавкьуну ялапар хъанахъисса улча.

Фестиваль дуллалиминнал агьамми мурадругу бур махъа нанисса ник ватан ххирану тарбия даву, балайрдал жанр, художествалул репертуар машгьур даву, балайрду тIутIиминнал магьиршиву ларай даву.