Американал чемпионатрай иян уккантIий ур Тимур Валиевгу

Аьрасатнал спортсмен Тимур Валиевлул щаллагу дунияллий цIаларгсса ва машгьурсса американал чемпионат­ращал (UFC) кьутIи чирчуну дур.
П. Рамазанова
Спортсменнал менеджер Ризван МахIаммадовлул бувс­мунийн бувну, август зурул цанний Лас- Вегасрай Тимур ччалли иянтIий ур американчу Жамалл Эммерслущал. Ва даражалул турнирданий Тимур цалчинни гьуртту хьунтIиссагу. Ванан 30 шин дур, ванал муттаэнангу вайкссара дур. Валиев ММА- лул чемпионатирттай 16-ла ххув хьуну ур, 2-ла ухгу хьуну ур.

Ванал муттаэ Эммерсма 17-ла ххув хьуну ур, 5-ла ух хьуну ур. Тимур панкратионналул Европанал чемпион ур, самболул спортрал мастер ур. Мукьийла ххув хьуну ур Аьрасатнал комплексный единоборствалул чемпионатирттай. Ва цувагу жула ла­кку оьрчI ур. Тимурдул мархри Хъусращатусса ва Ххутиятусса бур. ДакIнихтуну барча уллай буру жула жагьил, ва машгьур­сса чемпионатращал кьутIи чичаврищал ва чIа тIий буру октагонналувусса дебютрай ххувшаву!
Шиккува ххи буван, цIана UFC-лущал кьутIи чирчуну дуссар шама лаккучунал: Ислам МахIачевлул, Оьмари АхIмадовлул ва Тимур Валиевлул.