Дагъусттаннайн кьини дурксса чIумал коронавирусрал инфекциялущал талай захIматсса шартIирдай зий бивкIсса Респуб­ликалул азарханалул (РКБ) хIакинтурал захIматран лайкьсса кьимат бивщунни Аьрасатнал

Президентналгу, Дагъусттаннал бакIчитуралгу. Азарханалул кIия хIакиннан – аьмсса реанимациялул отделениялул хъунмур Аьйшат АьвдурахIманован ва Да­гъусттаннал медициналул университетрал госпитальный терапиялул кафедралул доцент, пульмонолог Валида Мурадован Аьрасатнал Президент Владимир Путиннул дуллунни Пироговлул орден.

Андриана Аьбдуллаева
[dropcap]В[/dropcap]ай бакъассагу,азарханалул медициналул 500-нния ливчу­сса зузалт лайкь хьунни личIи-личIисса наградарттан. Вайннавух бия «Дагъусттан Республикалул лайкь хьусса хIакин», «Да­гъусттан Республикалул цIуллу-сагъшиву дуруччаврил лайкь хьусса зузала» тIисса бусравсса цIарду ларсъссагу, Дагъусттан Республикалул ХIурматрал грамотартту ларсъссагу.

Ттуршахъул пишакар мукунма лайкь хьунни Дагъусттаннал БакIчинал чулухасса Барчаллагьрал ча­гъардан.
Наградартту лахъа-хъунну дуллунни азарханалул актовый залдануву. Мажлисрал ахирданий ихтилат бунни азарханалул хъунама хIакин, профессор Гъазияв Мусаевлул.

— Цикссагу инсантурал оьр­мурду ххассал буллай, зу гьарица кьини ккаккан дуллай буссару зула чувшиву ва пишакаршиву. Пандемиялул чIумал зу ми зула хасиятру хъиннура чIалачIи дунни, зула оьрмулун ва цIуллу-сагъшиврун нигьачIаву дусса шартIирдай зий.
Зу бувссар шаймургу, къашаймургу. На дакIнихтуну барчаллагь тIий ура зухь,-увкунни ванал цала зузалтрахь.