КIива миллатрал цIанихсса душ

Мариям Ибрагьимова

Февральданул 19-нний МахIачкъалалив, М. Горькийл цIа­нийсса Оьруснал драмалул театрданул Хъунмур залдануву хьунни чичу, шаэр, публицист, тарихчи, художник, хIакин Мариям Ибрагьимован 100 шин шаврин хас бувсса аьпалул мажлис.

 

«Гъази-Гъумучи» ансамбль

Бадрижамал Аьлиева
ДакIнийн бутан, уттинингу хьуссия МахIачкъалалив, Ла­ккуй, Ставрополлал, Краснодардал крайрдай, Москавлив Мариям Ибрагьимовал цIа абад дуллалисса мажлисру.
Мажлисрал официалмур бутIагу тIивтIуну, махъ лавхъуна ДР-лул ХIукуматрал Председательнал цалчинма хъиривчу Анатолий Карибовлул.
— Мариям – караматсса кьадарданул хъамитайпа бур. Мунил оьрму цуппава аьжаивсса, ссихIир бувсса, яргсса иширттал, хар-хавар бакъасса дуламанттал авадансса ца романдалуха лавхьхьусса бур. Мунил творчество, аьзизсса ДагъусттаннацIун дакъасса, дархIуну дур оьруснал культуралуцIунгу.

Рустам Ибрагьимов

Ванил Имам Шамиллуясса тарихийсса роман хасъсса пишакартурал Лев Толстойл «Война и мир» роман-эпопеялухагума лащан буллай бур, — увкуна ванал.
Хъирив махъ лавхъсса Ставрополлал крайрайсса Дагъусттан Республикалул вакил Аьбдулла Оьмаровлул бувсуна Мариян 50 шинай яхъанай бивкIсса Кисловодск шагьрулий ва му улклул цаймигу кIанттурдай дурсса шадлугъирттая. Бувсуна шагьрурдал ва шяраваллал библиотекарттайн мунил арснал биян бувшиву Мариям Ибрагьимовал 15 томрайсса жужру.
Лакрал райондалул бакIчи Юсуп МахIаммадовлул бувсуна Лакрал райондалиясса делегация гьуртту хьушиву Краснодардал крайрай хьумур шадлугъравух ва хIайранну ливчIшиву му хьусса даражалий ва лагрулий. Бувсуна, МахIачкъалалив медициналул кIулшивурттугу ларсун, Мариям тIайла бувккун бивкIшиву зун Ккуллал райондалийн, медик ва инсан хIисаврай агьалинан най буна ххира хьуну бивкIшиву.

Асмара Асадуллаева, Нурижат Шихаьлиева, Аида Шабанова

Барчаллагь увкунни Мариямлул арснахь Рустамлухь райондалул библиотекарттан ва школарттан буллусса луттирдахлу. Юсуп МахIаммадовлул кIицI бувна Рес­публикалул БакIчи Владимир Васильевлул цIаний культуралул ягу медициналул цания-ца идаралун Мариямлул цIа дизансса тавакъюращал буккансса хIукму кьамул бувшивугу.
Залданул гурсса хъатурдийну хьунаавкьуна социологиялул элмурдал доктор, профессор, Гуманитар элмурдал академиялул мяйжаннугусса член, Мариям Ибрагьимовал арс – Рустам Ибрагьимов.

— Инсаннаща цаярда махъ цири кьаритан бюхъайсса? Хъинсса цIа. Му цIанил ялун творчествагу духьурча, хъиннува хъинну лякъай. Ттула ниттил творчествалул цIаний дуллалимур арс хIисаврай акъарача на дуллалисса, ванил творчество ххираминнавасса ца хIисаврайра. Ванил творчествалуву бур Да­гъусттаннал щаллусса эпохалул тарих, цивухва итабавкьуну, буслай бур зунттал инсантурал оьрмулия, багьу-бизулия. «Имам Шамил» ккалли буван бучIиссар ванил творчествалул бриллиантран, — куна ванал. Яла лаивзуна цинявннайнагу барчаллагьрай­сса мукъурттий.
Мажлисрай ялагу махъру лавхъуна ДР-лул Чичултрал союзрал председатель МахIаммад АхIмадовлул, «Шамиллул фонд» тIисса цIанилусса культуралул ва тарихрал обществалул президент АьлиасхIаб Хархачаевлул.

Ва хьхьуну Мариямлул произведенияртту щаллу бунни Оьруснал театрданул, Да­гъусттаннал опералул ва балет­рал театрданул, Дагъусттаннал паччахIлугърал филармониялул, Лакрал театрданул, Яруссаннал театрданул артистътурал. Лак­рал райондалийсса ШавкIуллал шяраваллил школалул 4-мур классрал дуклаки душ Асмара Асадуллаевал, 8-мур классрал дуклаки душ Нурижат Шихалиевал ва Гъумучиял дянивмур даражалул школалул 11-мур классрал дуклаки душ Аида Шабановал бувккунни Мариямлул шеърирду. Мажлис ярг-яргсса номердайну чIюлу бунни М. Дандамаевал цIанийсса Гъумучиял оьрчIал искусствалул школалул «Гъази-Гъумучи», «Эхо гор», «Молодость Дагестана», «Ватан» ансамбллал.