Халкьуннал театрдал байран

КIулсса куццуй, гьашину­сса шин баян бувну бу­ссар Театрданул шинну. Му шинал лагрулийсса цалчинсса шадлугъ хьунни вай гьантрай МахIачкъалалив «Дагъусттан»  Культуралул дворецраву – «халкьуннал» тIисса цIа тасттикь дуллалисса театрдал ккаккия. Му хьунни «Театрдал олимпиада» тIисса цIанилусса Республикалул халкьуннал театрдал фестивальданул лагрулийгу.

Бадрижамал Аьлиева
Шадлугъ тIитIлатIисса ихтилат бунни ДР-лул культуралул министр­нал хъиривчу, Республикалул Халкьуннал творчествалул къатлул директор Марита МухIадовал.

Республикалул цайми районнаясса коллективирттавух ва шадлугъ нанисса кIива гьантлул дянив Культуралул дворецрал сахIналийн бувккунни Лакрал, Ккуллал ва ЦIуссалакрал районнаясса халкьуннал театрдугу. Миннал ккаккан дунни миллат­рал аьдатру, багьу-бизу.

КIира кьини халкьуннал актертурал биялну аьлтту бунни цалва пагьму-гьунар, ва хьунни театрал искусствалул мяйжаннугу­сса байран.