Январьданул 22-нний ДР-лул БакIчи Владимир Васильевлул МахIачкъалаллал Дусшиврул къатраву дунни ДР-лул Антитеррорданул комиссиялул батIаву. Микку гьуртту хьунни Национал антитеррорданул комитетрал председательнал хъиривчу Игорь Сироткин.
БатIаврий дунни 2018 шинал АТК-лул давурттал хIасиллу ва ххал бивгьунни гьашину дузал буван аьркинсса масъалартту.
Владимир Васильевлул бувсунни ххал бигьлагьисса масъаларттал цуксса агьамшиву дуссарив дагъусттанлувтурал оьрмурду нигьачIаврия буруччаврил чулуха. «Ларгсса шинал жулла республикалий хъинчулийсса дахханашивуртту хьунни. Властьрал органналгу, ихтиярду дуруччай органналгу, жяматийсса ва диннал идарартталгу цачIу дурсса давурттайну чан хьунни террористътурал иширттаясса нигьачIаву ва паракьатшиву хьунни аьмну лавсун региондалий. Муния кумаг хьунни республикалий экономика хъин чулиннай дачин дувансса шартIру сакин дуван», — увкунни республикалул каялувчинал.
Игорь Сироткиннулгу кIицI бунни ми органнал цачIу бувсса хIарачатирттайну бювхъуну бушиву субъектрал аьрщарай терактру хьун къадитан, чан буван аьдлу-низам лиян дуллалисса ишру ва ссуссукьу буван террорчитурал кюртти. Му бакъассагу, ихтилатчинал кIицI бунни терроризмалул профилактикалуву ДР-лул Минкомсвязьрал бугьлагьисса кIану хъунма хьуну бушиву. Игорь Сироткиннул хъинчулийсса кьимат бивщунни ДР-лул АТК-лул даврин.
Комиссиялул батIаврий ихтилат бунни мукунма ДР-лул ХIукуматрал Председательнал хъиривчу Рамазан Жяъпаровлул.
