Калошиннул роль дургьусса Дагъусттаннал халкьуннал артист Аслан МахIаммадов.
Лакрал театрданул сахIналий цIунилгу ккаккан бунни драматургиялул классик Александр Вампиловлул «Провинциал кIанттул анекдотру» тIисса пьесалийсса спектакль. Мунил премьера хьуссия ххаллилсса даражалий кIира шинал хьхьичI
Зулайхат Тахакьаева
Пьеса лакку мазрайн бувцуну бур Руслан Башаевлул. Режиссер МахIаммадаьрип Сурхатилов. Декорация — Аскар Аскаровлул.
Режиссернал спектакль хас бувну бур чIундакъа аьпалухьхьун лавгсса цала дуснал, Дагъусттаннал лайкь хьусса артист МахIаммад МахIаммадовлул аьпалун.
Спектакль сакин хьуну бур кIива бутIуя: «МетранпажнацIун бавхIусса бусала» ва «Малаикнащалсса кьура минутI».
КIивагу бутIувусса ишру хъанай бур «Тайга» тIисса провинциал кIанттул патирханалуву. Гьуртту хъанахъими бур, жура-журасса багьана-сававрттайн бувну, гиккун бакIрайн багьсса инсантал, хъярчийсса, аьчухсса, щяйтIан бакъасса.
«Замана язи къабугьайссар. Заманалувун жува бугу-бучIайссару, лагу-лагайссару», — увкуну бур режиссер Вячеслав Долгачевлул.
«Провинциал кIанттул анекдотирттаву» авторнал усттарну ккаккан дурну дур та заманнул рухI-ссихI ва цаппарасса хъярчийсса иширттайну ккаккан дуллай ур ттизаманнул обществалул оьрмулул суратгу.
Пьеса ларгмур ттуршукулул 60-ку шиннардил дайдихьулийва чивчусса бухьурчагу, ванил агьамшиву жула заманнайгу хъуннасса дур, гьуртту хъанахъиминнал бакIрачIан бувкIсса анекдот зумунусса ишру хаварбакъулий мусиватсса иширттайн кIура бавну, ахирданий хъяхъаву аьтIаврийн дуклай дур.
