Цумур макьан,такьва дуссар щаращул жартлил такьвалияр ххуйсса? Ца лахIзалисса ва такьвалух вичIи диширча, бакI, ня дигьалагай.
ХIисав дуркун, щаращи му хъанай бур оьрмулул дайдихьу,му бур яла ххуймур, узданмур кIану. ХьхьичIава буттахъал аьдатрайн бувну ци-дунугу щин-дунугу ляркъумур заллу укканнин щаращучIа дишайсса диркIссар. Щаращив ябайсса бивкIссар марцIну. Эшкьи хьуми щаращучIа хьунабакьайсса бивкIссар. ЩаращучIа къабучIиссар шялмахъ бусан, бурушин буван, дяъван. ХьхьичIазаманнай жула ниттихъал шаппа бищун къахъанахъисса бартнил урша щаращуй бишин лагайсса бивкIссар тIар, бищун бигьа хьуншиврул. НакI татан дишайсса диркIссартIар.
ЦIуну хъатIи бувсса жалин хьхьичIва-хьхьичI варакъущал щинав буцайсса ххаллилсса аьдат уттинингу яхьуну дур жула зунттаву.Амма ттизаманнай хъинну чанну бакъа варакъущалсса душру-хъами щинав най янилун къабагьай. Жула буржри щархъавусса щаращив, зилурду ябан, ми марцIну битан, буну тIий ми буттахъая жуйнма бивсса тарихрал ххазинарттуну.
Жул ЧIяйннал шяраву бур тарихраву цIарду ливчIсса щаращив-зилурду: Аьмма-Зийлу, Хъалух-Зийлу, Дянив-Зийлу, ЦIан-Зийлу, Бугълул-Кьулла, Щиннух-Зийлу, (ва кьавкьун бур). Шяраваллил ухнилу бур, аьпа баннав, ЧIяв мина дирхьусса, шиччавасса душгу бувцуну, оьрму бувтсса ссурхIиричу Рамазаннул бувсса щаращи. Жу ганийн Рамзил-Кьулла учару. Гьарцагу щаращул щинал буссар цинма лавхьхьусса тIин-тIааьнгу.
Ца чIумал Каспийск шагьрулий яхъанахъисса къашавайсса ттула буттарссин Хъалух-Зийлатусса щинал шуша гьан дурссия на ссайгъатран. Ганин дия гай щин ча ларсса дуссарив кIул хьуну. ЧIявуну шагьрурдай яхъанахъисса жула ЧIяйннал агьлу бикIай: «Хьурдай кIай шяраваллил зилурдал щиная нахIала буван», — тIий. Мукун кьиматрай дуссар шагьрулул агьулданучIа зунттал щаращал дяркъу щин.
Ларгсса экологиялул шинал ЧIяйннал школалул учительтурал ва дуклаки оьрчIал шяравусса зилурду марцI бувну бакьин бувуна.Вайннал каялувчиталну бия школалул учительтал Султанат Дибировна ва Соня Садикьовна.
Щархъавусса щаращив щарнил тарихрал ца бутIар, буттахъаяту жуйнма ирсирай бивсса. Жула цинявнналгу буржри ми ябуван, буруччин. Ябувара тарихрал ххару!
Арсен Аьбдуллаев
ш. ЧIяйми.
