[dropcap]А[/dropcap]ьбдуллатIиплул арс Аьлишаев ХIусайнбаг хъинну итххявхсса, спортрахун машхул хьусса, чурххалгу исвагьисса, шяраваллил кIанттай дуллалисса гьарцагу давривух гьуртту шайсса жагьил ивкIун ур. ХIусайнбаглун дурагу 8 шин дусса чIумал, мунал ппу ивкIуну ур, цала хъунмур ссищал ниттихун агьну ур.
Ххюлусмав школагу бувккуну, 1934 шинал къуртал бувну бур МахIачкъалаллал финансирттал ва экономикалул техникумрал кIива курс. Яла махъунай буттал шяравун зана хьуну, колхозрал счетоводну зий ивкIун ур. 1939 шинал октябрь зуруй увцуну ур армиялийн. Къуллугъ буллай ивкIун ур Белгород шагьрулий битултрал полкраву. 1940 шинал февраль-март зурдардий гьуртту хьуну ур Финляндиянал дяъвилий.
1942-ку шинал талай ивкIун ур Украиннал аьрщарай.
Вана ХIусайнбаглул цалва бувсмур:
— На уссияв 417-мур битултрал дивизиялувусса роталул старшинану. Жуй бивхьусса буржну бия душман усса кIанугу, гайннал гужгу кIул баву. Жул роталуву уссия 25 разведчик. Жу мадарасса «мазругу» бувгьуну, аьркинмур кIул бувссия.
На усса Воронежуллал фронт оборона дургьуну бия Курск шагьрулул кьилвалул чулий. Микку хIат-хIисав дакъасса аьрал бия цачIун буллай. Ца ххуллух жул мурадну буссия немецнал хIаписар ацинсса. КIанттул картагу ххуйну лархьхьуну, бавчуру разведкалий, хъунмурчIин ххярка тIий.
[dropcap]Р[/dropcap]акета риртсса ппурттуву гьарзат чанна лахъан дайва, му чIумал, хьхьичI ци духьурчангу, жун уттубишин багьайва. Жул янналул ялтту плащпалатка бикIайссия, щин итакъадакьайсса, жула лув му бириян байссия. Мадарасса манзилданийх немецнал обороналул вив бувхру. Пикри багьлай бур махъунмайсса ххуллу ласун къахьунссар шичча тIиссагу. ЧIун лаглай, солдатнал гъалгъалул чIурдугу арх бакъа баллай бур, техника къур дурссагу дур. Чани хьуннин зана бикIан багьлай бия. Жу бусса кIанттуяту арх акъа кIия инсан нанисса ххал хьунни. Най бур, ссаятучIав хаваргу бакъа. Жула чIарав бивсса чIумал, ххявххун, ца чIиллух утарду, цагу, автоматрал къуннагъ бакIрайх рирщуну, уттуишин арду. Къуннагъ рирщума плащпалаткалий ивхьуну, мурцIурду бувгьуну, ххюрхху увну, хъинну хъунмасса захIмат бувну, иян арду частьрайн. Га ивкIун ия немецнал хъунасса хIаписар. Жул щалла роталун дуллуна медаллу…
ХIусайнбаг буслан икIайва, 1943 шинал цалва документру гьан бувну бивкIссар Виричунал цIа дулун, амма къадуллунура личIаврил сававгу кIул дан къархьуссар тIий.
ХIусайнбаг хъинну чIярусса талатавурттавух гьуртту хьуссар, лавгссар Германнавун ияннин. НиттичIан бувкIун бивкIсса ца чагъарданий бур укунсса ххару: «Дадай, бувкIунни виясса чагъар, хъинну ххари хьура. Ттуя хавар ласурчан, ура хьхьугу-кьинигу иллай Гитлердул ккаччащал. Вай ччяни бухлаган бантIиссар, нагу ччяни зана хьунна. Ттул ссалам буси чIаххув хъаннихь: Арзихь, Аьйшахь, Гурсаланнухь. Дадай, ххари хьу, на Виричунал цIанин лайкь хьун ккаккан увунна. Ина ххирасса арс ХIусайнбаг, июль 1943 ш».
ТалихI бусса ухьунссия, щалва дяъвилий талайгу ивкIун, чIярусса щавурдащагу мурахас хьуну, сагъну ливчIун ур разведчик.
Дурсса виричушивурттахлу Аьлишаевлун дуллуссар Буттал кIанттул цIанийсса дяъвилул II даражалул орден, ЯтIул ЦIукул орден. МиннуцIун – чIярусса медаллугу.
ХIусайнбаг гьуртту хьуссар щала дунияллийх машгьур хьусса аьралуннал яла хьхьичIунми вакилтуравух тарихравун дурхсса Ххувшаврил Парадрай Москавлив.
Ванал цала дакIнийн бутлатимунива:
— Парад кьамул дуллай ия маршал Г. К. Жуков, каялувшиву дуллай ия парадрай маршал К. К. Рокоссовский. ЦачIусса музыкалул оркестрданувугу бухьунссия азаллихъайсса музыкантътал. Площадьрай кьюкьлуву авцIусса чIумал, ххаришиврул дакIницIун аьжаивсса къурхъ щарчуна, аьтIунссарив, хъянссарив къакIулну личIлай ияв.
ТрибуналучIа солдат бавцIуну, урчIа чулухунмай кIура бавну, цаннал хъирив цаннал экьибичайва немецнал ттугъру Лениннул Мавзолейрал хьхьичIун…
Армиялий арулла шингу дурну, дяъвилул цIаравухгу увккун, зана хьуссар ХIусайнбаг Аьлишаев шавайн 1945-кусса шинал октябрь зуруй. Амма аьрай ккавкмунил ва бухIан багьмунил биян бувсса зарал-зиянгу чIиви-кьивисса бакъахьунссия, Аьлишаев аьпалухьхьун лавгссар оьрмулул 60 шиннагу къархьуну. Цал бунагьирттал аьпа баннав, жула тархъаншиврухлу талай ивкIсса цал цIанил кьадру ва кьимат абадлий бухкъалаганнав.
Якьуб Майранов
