Ларгсса бигьалагай кьинирдай, июль зурул 16-17-нний, хъуннасса уттарашинна дия махъсса шиннардий ялу-ялун пахъдагьрулуву личIлачIисса 1-мур ЦIувкIуллал шяраву. Республикалийсса ва цайми регионнайсса шагьрурдай, шяраваллаву яхъанахъисса цIувкIул бавтIун бия буттал шяравун. БавтIун бия ливтIуцириннал гьаттардий алхIам буккин, ппухъ­руннал къатраву рухI дишин, шяраву яхъанахъиминнал хIалкьазия ккаккан, минналми буруккинтту ва ххаришивуртту ссал ялув­сса, ссацIун дархIусса дурив кIул буван. Му мурадрай шяраваллил клубраву дурна собрание. Ца ххуйну бакьин бувну биякьай ЦIувкIуллал клуб! Культуралух хъуннасса къулагъас дусса, сайки гьарцагу чIири-хъунсса мероприятиягу кIиву дувайсса заманнайвагу къаккавкссар ттун клуб кIукун, тавхана кунма, бакьин бувну! ТIайламур бусан, къакIулли му щил хIарачатрив, амма шаттирал бакIрах кризисрал чIувин буллалисса заманнай клуб кIа даражалий бакьин бувансса ххуллу-чаран лякъаву – мугу дакI ххари дуллалисса хавар бия. ЧIяру-чIярусса мероприятияртту дуллан нясивну ля­къиннав кIа клубраву, лахъива-лахъисса лякъиннав кIанил оьр­му!
ПатIимат Рамазанова
Клубравусса собраниялий ЦIувкIуллал Жяматий­сса советрал хъунама, профессор, академик ХIу­сай­ханов МахIаммадбаглул мас­лихIатрайсса ихтилат бувна, бувсуна шагьрурдайсса цIувкIул шяравуминнал чIарав бацIантIишиву ттиния тихунмайгу, жува мудан дакIругу цану, махъгу ца бувну зун аьркиншиву жунна цинявннан аьм­сса ватан аякьалий ядан­сса хIарачатрай. МахIаммадбаг Кьагьировичлул, жямат цукун­сса масъалартталсса бувну ччай буссарив кIул буван, махъ буллуна сахIналийн увккун махъ учин ччиманахьхьун.
Шяраваллил агьалинал цIуцIи кIанттурдая бусласи­сса ихтилат бунни Пагьламантурал школалий каялувшиву дуллалисса Рамазан ХIажиевлул, шяраваллил ФАП-рал хъунмур ПатIимат Абакаровал ва цайминнал. Гьаз бувна шяраву ттигу мобильная связь зий дакъашиврул цIуру-кIурулийсса ихтилатгу, гьаз бувна цайми-цаймигу агьамсса масъалартту.
Собрание къуртал хьуну мукьах, зюннав-дачIулущал жямат бавчуна шяраваллил зума-къирагърайсса байранну дай майданнив, Лявкъурув. Тикку ккашилманан хъинсса хъамалушинна дия, къавтIун бизан ччиминнан гурсса ссухIват бия. Цамур цичIав бакъахьурчагума, магъулу ккучу-ккучунну дурну, щалихханнинсса хавардай бия нажагь бакъа цачIун къашайсса агьлу. Дяхьхьунивунин лахъи лавгуна ссухIватгу, нахIусса ихтилатругу. Шиккува кIицI лаган, къавтIаврил, балай учаврил пагьму бусса жагьилтуран цавувасса бюхъу-хIарачат кка­ккан бувансса сант духьувкун, жагьилтал булувкьуну, тазану ва тяхъану лагма лавгун бия.
Хъирив кьини кIюрххила жямат бувккуна хIатталлив, гикку кьулгьу, алхIамгу бувккуну, шяравусса инсантурачIах був­ккуна. Ужагърайн хъамал бу­ххаврия мудангу ххарисса бугьараминнал дакIру тирх учинмур бувна. Муния махъ жямат бавчуна ссурхIиял дазуцIухсса лухччайн, Цумур Щинайн. Ги­ккур цIувкIуллал хъуни байранну дувайссагу. Гъараллу гьарза­сса духьувкун гьашинусса шин, дияча лухччай ца аваданшиву, дияча дюрхъуну гьанну ва сунну! Уртту-тIутIавун дахьларг­сса лухччай, чятирдугу бивщуну, ххункI ххирами ххункI бичлай, шашлыкру ччими миннуха зий, кув ттуплий буклай, кув балайрду тIий, къавтIий, ца ххуйну бигьалавгуна жямат. Нагу, лух­ччинийн бавтIцириннахь цIухху-бусу бансса хIалу дагьну дунура, бигьалаглагиминначIах лагма бувкра. КIибавчIунни миннал цалва пикрирдугу «Илчи» кказитрал буккултрайх.
ХIусайханов МахIаммадбаг, физикалул-математикалул элмурдал доктор, профессор, академик:
— На пашмансса пикрирдай икIара, щаллагу дунияллий лакралгу, дагъусттанналгу цIа гьаз дурсса пагьламантурал мина, буттал шяравалу духларгун най дурхха ва ттула оьрмулул мутталий тIий. Хъун ЦIувкIул тIисса цIа хIазран дакъар шяраваллин дирзссагу, азаруннияр гьарзасса къатри диркIун дур шяраву. Шиная шинайн шяраву чан хъанай бур агьлу. Нава кунма мукунсса затру кьурчIи бизлазимигу лагма лаган бувну, хIарачат буллай буру жулва биялалиймур буван, вава мурадрай дувару шяраваллил байран- кьинирду. Буцару шяравун шагьрурдай хъуни хъанахъисса жулва наслу, бутта­хъал шяравалу ккаккан, куннащал ку кIул хьун. Жура шагьрурдайгу дувару байранну, аьдатравун дагьунни Интнилхьхьу ва Ххувшаврил байран цачIу дуваву, миккугу мудан жагьилтурахь жува ца гьанулиясса бушаву хъамамабитари тIисса, маслихIатрайсса ихтилатру бувара. Жулва наслулун ппухълуннал тарихгу кIулну бикIаншиврул, лакку мазгу лахьланшиврул чичлай ура лакку мазрай ЦIувкIуллаясса лугу.
АьбдурахIман Халилов, техникалул элмурдал доктор, профессор, академик:
— Шяраваллил цIа-кьини адаврай гьаз дувансса хIарачатрай, жулва хьхьичIунсса арсурваврал дайдирхьуна цаппара шиннардил хьхьичIва жува кунная ку ят къабуцаншиврулсса, хайр-мюнпатрансса давурттив. Пагьламантурал школа шяраву тIитIин бюхъаву хъунмасса тIайлабацIу хьуна. ХIукуматрал къуллугърай зузисса Артур Исрапиловлуща бювхъуна кIира шинай цал дувавансса Пагьламантурал фестивальданул дайдихьу дувангу, му даву сантирай бакIуйн дуккан дувангу. 2011 шинал дурсса фестивальданийн увкIуна та ппурттуву Дагъусттаннал президентну зузисса МахIаммадссалам МахIаммадовгу. Жува жулва буржну ккалли буллай буру вай жяматрал багьу-бизулух бургаван, вай ца низамрал ххуллийх бачиншиврул, жувагу вайннал чIарав бушиву ккаккан буван. Халкьуннан хъинмур, ххуймур буллан. ЧIявусса жагьилтал ва мюрщисса оьрчIру бур байрандалийн бавтIун. Жулва буржри миннан жулва шяраваллил тарих лахьхьин буван, шяраваллил язисса арсру ва душру дакIнийн бутан. Мюрщимигу, хъунимигу байрандалия рязийну бур. Ххарину бур. Вая жулва мурадгу. ЧIа тIий ура буттал шяраваллил агьулданун ттиния тиннайгу дюрхъусса кьинирду!