Июль зурул 12-нний Дагъусттаннал Диндалул иширтталсса буллалисса комитетрал хъунама МахIаммад АьбдурахIманов ва муфтиятрал вакилтал хьунабавкьунни щалвагу Аьрасатнаву ххуйну кIулсса сиамский кIинничалтравасса Гита Резехановащал ва мунил ниттищал.

П. Рамазанова
Къиргъизнаву яхъанахъисса, мархри Дагъусттаннаясса Зитал ва Гитал оьрмулия къабавсса ушиву къакIулли. Чурххал цаппара базурду хIала бувхсса кIинничалт Зитал ва Гитал оьрчIнийсса хиял бивкIун бур цащава занан хьуния тIисса. 2003 шинал, аьрасатнал хIакинтурал тIайлабацIу буну операция бувну, Зитал ва Гитал аьмсса базурду личIи був­ссия. Амма душваврал цIуллу-сагъшиврул тагьар тачIаврагу цIа дансса дакъассия. 2015 шинал Зита дунияллия лавгуна. Гитангу мудан хIакинтурал кумаг аьркинну бия. Резехановхъал хиял бия, Аьра­сатнаву ххуйсса хIакинтал бухьувкун, Аьрасатнал гражданство ласун хьуния тIисса. Миннал хиял дузрайн буккан буван кумаг бувну бур Дагъусттаннал БакIчи Рамазан АьбдуллатIиповлул. Мунал Аьрасатнал Президент Владимир Путиннуйн чагъар чивчуну бур, Резехановхъан Аьрасатнал гражданство ласун кумаг бува тIисса. Июль зурул 11-нний МахIачкъалалив прописка душиврул штампру хьуссар Гитал ва мунил ниттил паспортирттай. Вана утти миннайн жучIанма хъамалугу оьвкуну.
Зитащалсса хьунабакьаврий гьуртту хьунни республикалул муфтийнал хъиривчу АхIмад-хIажи Кахаев, МахIачкъалаливсса Хъунмизитрал имам Идрис-хIажи Асадуллаев. Къиргъизнаву мадрасалуву дуклакисса Гитайн Дагъусттаннайсса исламрал вузраву дуклан оьвкунни Кахаевлул му хьунабакьаврий. Гитангу, мунил ниттингу ккаккан бунни МахIачкъалаллал Жумяъ-мизит. Мизитраву Кьурандалул сурарду, аятру дурккуну мукьах, Гита хьунабавкьунни «Хидаят» тIисса, ччимур душнища исламрал кIулшивурттугу цIакь дурну, усттарну дукра дувангу ла­хьхьин байсса, центрданул коллективращал. «Маидат» ресторандалуву Дагкомрелигиялул председатель М. АьбдурахIмановлул Зитан дуллунни Республикалул БакIчинал чулухасса бахшишругу, муфтиятрал вакилнал буллунни исламрал луттирду.
Зумрият ва Гита Резехановхъул барчаллагьрай бур Аьрасатнал гражданство ласун кумаг бувсса Рамазан ХIажимурадовичлуйнгу, цивппа Дагъусттаннай хIурматрай кьамул бувсса Дагкомрелигиялул хъунаманайнгу ва муфтиятрайнгу.
Ххирасса ссил Зитал бивкIулул къума лаган бувсса хъамалудушнин чIа учинну цIуллушиву, Да­гъусттаннайсса исламрал вузраву кIулшивуртту цIакь дуллан­сса тавпикь.