Ларгсса нюжмардий Каспийскалий шагьрулул Хъунмур библиотекалий хьунни Дагъусттаннал халкьуннал шаэр Сугъури Увайсовлул оьрмулул 80 шинан хас дурсса шадлугъ. Му дачин дурну бия шагьрулул 2-мур школданул лакку мазрал учитель Анзират АхIмадова.
Бадрижамал Аьлиева
Шадлугъ дайдирхьуна Каспийскаллал ЦБС-лул директор, «Аьрасатнал нинухъру» суккушиндарал регионал отделениялул председатель Таиса МахIаммадовал. Цилва ихтилатраву ванил кIицI лавгуна Сугъури Увайсовлул щалларагу творчество видурцIуну душиву адав-инсапрал, инсаншиврул, ххуйшиврул ва хъиншиврул.
Шаэр юбилейращал барча уван бувкIун бия Каспийскаллал шагьрулул администрациялул, идарарттал вакилтал, миллатрал патриотътал. Махъ лавхъуна шагьрулул Культуралул иширттал ва жагьилтурал политикалул управлениялул начальник Пайзанат Абачараевал. Мунил бувккуна шагьрулул бакIчи МахIаммад Аьбдуллаевлул чулухасса барча баврил ххаругу.
Анзират АхIмадовал гьарта-гьарзану бувсуна шаэрнал оьрмулия ва творчествалия. Дуклаки оьрчIал лакку мазрай дурккуна Сугъури Увайсовлул назмурду.
Шаэр барча уллай, академик Муса Абачараевлул увкуна:
— Инагу, нагу сайки ца оьрмулул буру. Жува хъуни хъанай бивкIру хъинну захIматсса чIуннардий. Амма хасну ми захIматшивурттал жува хъуни бунну кьянкьа-кьурчIину, миннул лахьхьин бунни жунма махъунмай къахъанан…
Каспийскаллал медициналул училищалул муаьллим, Ваччав Сугъурищал архIал хъуна хъанай ивкIсса ХасмахIаммад Мусттапаевлул цалва ихтилатраву кIицI лавгуна юбиляр оьрчIнийва ивкIшиву назмурду чичавриву итххявхсса, халкьуннал шаэрнал цIанингу лайкь хьушиву цалва гьунарданийну, захIмат ххирашиврийну.
Каспийскаллал КIулшиву дулаврил управлениялул начальник Сулайман НурмахIаммадовлул кIицI лавгуна шагьрулул школарттай гьар дуккаврил шинал шайшиву шаэрнащалсса хьунабакьавуртту, мунал произведениярттаву агьамсса кIану бугьлай бушиву хъиншиврул, кувннан кувннал кумаг баврил, дакI тIайлашиврул, хаин къашаврил гьанурдал.
Юбиляр барча уллалисса махъ лавхъуна Шагьрулул Мажлисрал депутат, техникалул элмурдал доктор Ибрагьим Абачараевлул. С. Увайсов юбилейращал барчагу увну, ванал гьарта-гьарзану бувсуна лакрал миллатрал Каспийск шагьру бавриву, Буттал КIанттул цIанийсса Хъунмасса дяъвилий ларсъсса Ххувшавриву цуксса хъунмасса захIмат бивхьуссарив, хаснува ва кьини библиотекалувун бувкIсса махъа нанисса жагьилсса никиран кIулну бикIаншиврул хIакьмур, тIайламур.
— Республикалийсса лакрал миллатрал 50 азара инсаннава 1941 шинал дяъвилийн лавгссар 10 азара инсан, му хъанай бивкIссар миллатрал чиваркIуннал сайки щалва бутIа. Му хъанай бивкIссар дяъвилувух гьуртту шаврил Аьрасатнал ва Дагъусттаннал циняв миллатирттаву яла лахъмур процент. Ттул буттал шяраву Ххюлусмав ливчIун ивкIссар заэвсса шама къужа, махъсса циняв арамтал, ца хьуну, дяъвилийн лавгун, — увкуна Ибрагьиннул.
Махъру мукунма лавхъуна «Авиалинии Дагестана» ОАО-лул пресс-службалул каялувчи Алексей ХIажиевлул, «Каспийскгаз» МУП-рал хъунама инженер Рамазан Сулаймановлул. Вайннал кIицI лавгунни инсантурахсса ччаврил, юбилярнал дакI хъун дакъашиврул, цумушиврул, дусшиву дуван кIулшиврул муначIан мудангу чIявусса инсантал кIункIу байшиву.
Сугъури барча уван ва кьини бувкIун бия лакрал машгьурсса балайчи Ссапижат Оьмаровагу.
Гихунмай махъру лавхъуна юбилярнал уссу ва ссу Увайслул ва Аьйшатлул. Миннал дакIнийн бивчуна цалла оьрчIшиврувасса цаппарава муттарду, барчаллагь увкуна ва даву дурминнайн, цалва чIарав бацIан бувкIминнайн.
Ахирданий махъ лавхъуна юбилярнал цалва. ДакIнийн дирчуна цалла оьрчIшиврул шинну, кIицI лавгунни, га чIумалсса оьрму, цуксса захIматсса бивкIнугу, цамуних баххана къабуваншиву, гай захIматсса шинну хьушиву учительталну. Барчаллагь увкунни Таиса Билаловнахь ва батIаврихлу. Бувккунни цалва шеърирду.
С. Увайсовлул 80 шинан хас бувну, Лакрал театрдануву хьусса мажлисрая жу бусанну хъиривмур номерданий.
