Цурда чIирисса диркIун духьурчагу, Къичурлухиял шяравату къачансса бувккун бур чийву цIа машгьурсса инсантал – ччарча совет замана бучIаннинсса чIумал, ччарча бувкIун махъсса шиннардий, ччарчагу Къичурлухиял щар Лаккуяту арандалийн дизан дурну мукьахсса чIумул мутталий.

АцIния урчIилчинмур ттуршукулий оьруснал паччахIнал аьра­луннаву къуллугърай ивкIсса Къистилихъал АхIмадлул аьрай талай дурсса чувшивурттахлу ларсун дур сайки циняв дур учинсса та чIумул наградартту. Ванала ппу Къистилихъал Сулла тIисса чув къуллугъ буллай ивкIун ур Гъази-Гъумучиял Агълар-ханначIа, ханнал мунайн тапшур байссагу бивкIун бур ца яла жаваблувшиву ва чувшиву аьркинми масъалартту.
Му тарихийсса тухумрацIун дархIусса дур хъинну чIявусса лакран кIулсса, цалва жяматралгу, цайми-цайминналгу дянив бусравшиву ххишаласса инсан, Амирханнул арс Амирханов Исял нясавгу. Оьрмугу ванал бувтун бур му лахъсса цIанин лайкьну.
Ися увну ур 1935 шинал зунттавусса Къичурлухиял шяраву. Ванан дурагу ххюра шин хьусса чIумал цаннал хъирив ца ливтIуну бур ппугу, нинугу. Лаккуяту Къичурлухиял шяравалу дизан дуллалисса чIумал, яни 1944 шинал, Исян диркIун дур 9 шин.
Ччяни ятинтал хьусса Исягу, ванал чIавама уссу АхIмадхангу, хъунигу бувну, ччаннай бацIан бувну бур буттауссурваврал. Ххишала бакъа хъунмасса кьад­рулий ва барчаллагьрай зумухгу ласлан икIай Ися миннал цIарду.
«Цува аьрай унува, ссил цIаний чирчуну, жун, цала уссил арсурвавран, буттауссу ХIасаннул гьан дайва цанна дулайсса хIаписарнал аттестациялул арцу, кув чIумал – 4000, кувнигу – 5000 къуруш», — тIий, дакIнийн бутлай ур Ися.
Мукунмасса кьадрулий ва хIурматрай кIицI лаглан икIай Ися буттарссу ХIабибатлул цIа­гу.
Ччаннай авцIуну махъ Амирханнул арс Амирханхъал Исял бувтсса оьрмугу, оьрмулуву бартбивгьусса мурадругу ччинал дахIалай учинсса бур. Ися зий ивкIун ур, та чIумух бурувгун, хъинну ккалли дансса давурттай: Кьиблалул Сухокумскаллал ОРС-рал хъунаману, МахIачкъалаллал Горплодовощторграл директорну ва м.ц. Ми давурттугу ванал нани дурну ивкIун ур лайкьсса даражалий. Му бакъассагу, ванаща бювхъуну бур чIявусса инсантурал чIарав ацIан, кумаг бан. Хьун дайсса диркIун дур биялсса лак­ран давуртту. Ми хIакьинусса кьинигу барчаллагьрай бикIай ванайн.
Вай гьантрай Амирханнул арс Амирханов Ися лахълай ур цалва оьрмулул мяйцIалчинсса лахъазанттуйн. Яхъанай ур бусраврай цалва ххаллилсса душварал ва миннал оьрчIал дянив.
ЧIа учинну жувагу Исян цIуллушиву, цIу-цIусса ххари-хъиншивуртту. Яаннав ина Заннал винагу, вилацириннангу!
Жул корр.