Декабрь зурул 21-нний Дагъусттаннал Виваллил иширттал министерствалул тIайла дурккунни Къиримнавусса полициялул зузалтрал оьрчIан ЦIусса шинал байрандалийнсса бахшишру.
А.Аьбдуллаева
Виваллил иширттал министерствалул къатрал хьхьичIсса майданнив гуманитар кьайлущалсса машина тIайла буккан бувккунни ДР-лул виваллил иширттал министр, полициялул генерал-лейтенант Аьвдурашид МахIаммадов, МВД-лул Ветерантурал советрал председатель МахIаммад МахIаммадов, Полициялул зузалтращалсса даву дачин дурсса управлениялул хъунама Сергей Макуха ва МВД-лул подразделениярттал зузалт.
— ДР-лул МВД-лул Жяматийсса советрал, Ветерантурал советрал ва республикалул виваллил иширттал органнал зузалтрал хIукму бунни ЦIусса шинал байран гъан хъанахъисса гьантрай Къиримнавусса цалва коллегахъал чIарав бацIан. ЛичIи-личIисса багьана-сававрттайн бувну, Къиримнавусса жулва агьлу энергиялул чулухасса, дуки-хIачIиялуцIун дархIусса захIматшивурттащал хьунабакьлай бур. Жун пикри хьунни ва оьрчIан яла ххирамур байрандалий ми ххари бан. ОьрчIан ккуллардал щютIру баллан къааьркинссарча, ми бахшиширттайну ххари буллан аьркинссар, — увкунни министрнал, бахшиширттал бувцIусса машина тIайла буклай. Министрнал бувсунни ва ххаллилсса акция дансса пикри ДР-лул МВД-лул Жяматийсса советран ва Ветерантурал советран дакIнийн багьшиву. Му пикри ххарину кьамул бувшиву цинявппагу МВД-лул зузалтрал, подразделениярттал каялувчитурал. Аьвдурашид МахIаммадовлул мукунма бувсунни Дагъусттаннал хIукуматрал чулухагу, ДР-лул БакIчинал чулухагу гуманитар кьайлул конвой нанишиву Къиримнавун, цанмагу, му хъинсса акциялувух хIала бувххун, захIматсса шартIирдай зузисса цалва коллегахъал чIарав бацIан пикри хьушиву.
Ванал чIа увкунни Къиримнавусса коллегахъан цинярда хьунадакьлакьисса захIматшивуртту духIансса цIуллушиву.
Министрнал ихтилат къуртал хьуну махъ, цинявннал хьхьичIух лавгунни Къиримнал оьрчIансса бахшиширттащалсса кьай духхай машина.
Къиримнал оьрчIансса бахшишру ларсун дур республикалул Виваллил иширттал министерствалул ва миннал биялдаралусса подразделениярттал зузалтрал арцух. Ми арцух ларсун дур игрушкарттащал_сса, нахIу-нацIулущалсса ва оьрчIру итххяххан байсса тIуркIурдащалсса 1000 кьуцури.
