Уттигъанну «Дагестан» РИА-луву хьунни КВН-далул «Сборная Дагестана» командалул вакилтуращалсса хьунабакьаву. Журналистуращал хьунабакьин бувкIун бия командалул капитан Абсалуттин ХIамзатов ва мунил гьурттучи Арсен ЛухIуев.
Бадрижамал Аьлиева
Вай гьантрай Цалчинмур каналданий ккаккан дурсса КВН-далул Лаваймур лигалул четвертьфиналдания, жулла командалул мунивухсса гьурттушиннарая буслай, жагьилтурал кIицI лавгунни хъинну хъунмасса захIмат хьушиву мунийн хIадур хъанай, чIирисса чIун, бувагу 17 гьантта, дуллуну душиву хIисавравун лавсун. Мукун бунугу, ва ххуллухгу жулва КВН-щиктал ххуйну бувккунни, вайнная жюрилул члентурал дуцири цIардугу дунни, Дмитрий Нагиевлуя тIайла хьуну. Ххуйну хIадур хьуну, хьхьичIунсса программа сакин даншивруллив лагайсса бур барз ва бачIи.
Жагьилтурал бувсунни цIана цивппа хIадур хъанай бушиву Высшая лигалул полуфиналданийн.
— Репетициярду дайдишайссар ссят 19.30. хьуну махъ, цанчирча командалул гьарцагу членнал дур цалла-цалла агьаммур даву, кулпат, цалва цайми ишру, къайгъурду. ЦIанарив жуй хъиннура хъуннасса жаваблувшинна дур. Тамашачитурал жуйнна дурсса вихшала щялусса къахьун, жува ккаккан бувсса даража ялавай къахьун, жуйсса буржри хъиннува ххуйну ва гужну хIадур хъанан, ххув хъанан, — увкунни Абсалуттин ХIамзатовлул.
Гихунмай вайннал бувсунни ва хIакьинусса даражалийн лахълай, КВН-лул Дагъусттанналмур лига сакин буллай 5-6 шин хьушиву, гьунар бусса, итххявхсса жагьилтурах луглай, ми ялун личин буллай.
— ЦIанарив ДР-лул Жагьилтурал иширтталсса байсса министерствалул, мунил бакIчи Заур Кьурбановлул хIарачатрайн бувнугу жучIа бур жулва лига. Мунил фестивальгу хьунтIиссар Дарбантлив, ва зуруй, мунивух гьуртту хьунтIиссар жулла республикалул личIи-личIисса вузирдал командартту, цинярдагу 16, — бувсунни Арсен ЛухIуевлул.
Ихтилатру хьунни ва шинал Балтийский хьхьирил зуманив, Калининградуллал областьрайсса Светлогорск шагьрулий хьунтIисса «Голосящий КиВиН» фестивальданиягу, бувсунни мунийсса чIявуми хъярчру бикIантIишиву кIа областьрацIун ва кIа шагьрулуцIун бавхIусса.
Вай барчаллагьрай бур «Сборная Дагестана» командалун кабакьу буллалисса ДР-лул Президент Рамазан АьбдуллатIиповлуйн.
— Жун бувчIлай бур, Цалчинмур каналданийн жува цуксса ххуйну буклай бурув, муксса чIявусса дагъусттанлувтуран ччай бушиву КВН-далий буклан. ЧIявусса жагьилтал буклакиссаксса КВН-далий, мукссара ххуйсса цIусса команда хIасул хьунтIиссар, цилгу жулла республика мунил кьатIув лайкьну ккаккан дуллантIисса, — увкунни вайннал.
Журналистурал буллусса суаллахьхьун цалла зумуну цIу бусса жавабру дуллунни жагьилтурал.
