Жу уттинингу чичарду Совет Союзрал кIийла Виричу АхIмад-Хан Султаннул 1942 шинал майрал 31-нний Ярославуллал ссавний таран дурну, душманнал самолет дуртун диркIшивугу, Ярославрай бусалардавун агьсса летчикнан ххаллилсса гьайкал дацIан дуршивугу. Ярославрал областьрал хъуниминнал ва тийхсса Дагъусттаннал диаспоралул хIарачатрайну. Му гьайкалданий гьашиву къадурну, уттигу хъинсса даву дунни миннал: самолет дагьсса кIанай, Дымокурцы тIисса шяравугу дацIан дунни Виричунал суратращалсса мармарчарил улагу дусса гьайкал.
ПатIимат Рамазанова
Дымокурцылив уттигу сагънува бур пуркIурал гъулувтусса АхIмад-Хан ккаккайхту, му немецналма летчик ххай, чIатIращал, ттуршардищал мунайн гьужумрай бивкIсса, куврив му немец унугу, жулла аьрщарай ивчIан къаитанну тIий, мунал хьхьичIун ххявххун бивкIшиву дакIнийссагу. Иваново шагьрулийсса «Каспий» культуралул центрданий каялувшиву дуллалисса, Бярнихиял шяравасса Всеволод Кьурбановлул бувсунни, чIявусса агьалигу бавтIун, тIиртIушиву Дымокурцыливсса гьайкалгу. Микку гьуртту хьуну бур аьрщарал мяъданну лахьлахьисса ва куртIсса къувирду дуккайсса, элмийсса федерал центрданул хъунама, ПаччахIлугърал премиялул лауреат, ЦIущарниясса Билал Хахаев, Ярославрал областьрайсса «Дагъусттан» тIисса культуралул ккурандалул председатель, Къяннал шяравасса Шяпи Оьмаров, Москавуллал областьрайсса вацIлул хозяйствалул ца яла хьхьичIунма пишакар, каялувчи, Хъювхъиял шяравасса Заурбаг Нахаев ва машгьурсса «Форема» фабрикалул хьхьичIусса пишакар, ЧIурттащатусса Юсуп Сагъиров. Всеволод Кьурбановлущал цачIу ми суратрай бур. Хъунмасса пахру багьлай бур жулва лак архсса шагьрурдайгу лакрал цIа гьаз дуллалисса давурттавух хIалану бушивриягу, Ярославрал областьрай миннал хIурмат бушивриягу. Ва, яла-яларив, бюхттулсса летчикнал цIа бюхттулну ядуллай бушивриягу. Вирттал цинявннан ххиранугу бикIан аьркинни.
